Resei qorǵanys ministrligi Mariýpoldegi "Azovstal" zaýytyn tolyq baqylaýǵa alǵanyn málimdedi. Zaýyt aýmaǵynda qalǵan 2439 ýkrain jaýyngeri tutqynǵa túsken.
Vedomstvonyń aitýynsha, 20 mamyrda "Azov" batalony jaýyngerleriniń sońǵy toby - 531 adam, onyń ishinde bólim komandirleri berildi. Kombinattyń jerasty qurylystary Resei áýe kemeleriniń baqylaýyna ótti. Resei qorǵanys ministri Sergei Shoigý prezident Vladimir Pýtinge zaýytty osylaisha "tolyq azat etkenin" baiandaǵan.
"Azovstal" aýmaǵynda qalǵan ýkrain jaýyngerleri 16 mamyrda tutqynǵa túse bastaǵan. Olardyń taǵdyry belgisiz. Ýkraina qorǵanys ministrligi "Azovstal" sarbazdaryn tutqyn almasý protsedýrasy arqyly úilerine qaitarýǵa tyrysatynyn málimdedi.
Azattyqtyń Orys qyzmetiniń habarlaýynsha, memlekettik dýmada "Azov" polkiniń jaýyngerlerin Ýkrainaǵa bermeý týraly úndeýler aitylǵan. 17 mamyrda Resei bas prokýratýrasy da joǵarǵy sotqa qaiyrylyp, ýkrainalyq "Azov" polkin terroristik uiym dep tanyp, elde onyń qyzmetine tyiym salýdy suraǵan.
"Azov" polki jáne ýkrainalyq ózge de áskeri bólim jaýyngerleri naýryz aiynyń basynan qorshaýda qalǵan Mariýpol qalasynda orys áskerine tótep berip, keiin "Azovstal" metallýrgiia kombinatynda turaqtaǵan.
Aita keteiik, Ýkraina prezidenti Vladimir Zelenskii Mariýpoldaǵy "Azovstal" metallýrgiia zaýytynyń Resei áskerine berilgenin janama túrde rastady.
"Kásiporyndaǵy adamnyń barlyǵy derlik zaýyttan shyǵaryldy", dedi Zelenskii 20 mamyr keshke "Ýkraina 24" telearnasynda kórsetilgen suhbatynda.
"Azamattar shyǵaryldy. Dárigerler shyǵaryldy. Aýyr jaralanǵandar shyǵaryldy. Jaqyn arada bárin shyǵarý aiaqtalady", - dedi ol.
Zelenskii tutqyndalǵan ýkrainalyq jaýyngerlermen jaǵdai qiyn ekenin aitty.
"Jigitter áskeri qyzmetkerlerden olardyń shyǵýǵa jáne óz ómirin saqtaýǵa tolyq quqyǵy bar ekeni týraly signal aldy", - dedi prezident.
"Azov" polki - 2014 jyly eriktilerden qurylǵan batalon. Ony "ásireońshyl belsendiler" qurǵan dep aitylady. Biraq "Azovtiń" kóptegen jaýyngeri ózderiniń "neonatsist" emes ekenin aitady. Polk Ýkraina qarýly kúshteriniń quramyna engen.
