Búgin, 10 qazanda Ýkraina astanasy Kiev qalasynda birneshe jarylys boldy, jarylys qalanyń ár óńirinde jalǵasyp jatyr. Bul jóninde DW arnasy resmi derekkózderge súienip habarlady.
"10 qazanda tańerteń Kievte kemi eki jarylys boldy, ólgender bar" deidi basylym.
DW taratqan málimetke qaraǵanda, Ýkraina ishki ister ministri keńesshisi Rostislav Smirnov Kievtiń Shevchenko aýdanyndaǵy jarylystan 8 adam qaza taýyp, 24 beibit adam jaralanǵanyn aitqan.
DW telearnasy Dnepr, Jitomir, Ternopol, Lvov qalalary da zymyranmen atqylanǵanyn jazyp otyr.
Biyl 24 aqpanda Ýkraina basyp kirgen Resei Kiev qalasyn birneshe kúnde basyp alatynyn málimdegen. Biraq Kievti ala almai, keiingi kúnderi Ýkrainanyń birneshe oblysynyń jerin "referendým" nátijesi boiynsha anneksiialaǵan.
Ýkraina "referendým" nátijesin moiyndamaitynyn, óz jerin azat etkenshe toqtamaitynyn málimdegen. Qyrkúiek aiynda Harkov oblysyn azat etip, shabýylyn jalǵastyrǵan. 21 qyrkúiekte Resei prezidenti Ýkrainadaǵy soǵysqa bailanysty ishanara mobilizatsiia jariialaǵan.
Ótken senbi, 8 qazanda Resei Ýkrainadan 2014 jyly anneksiialap alǵan Qyrym túbegin Reseimen jalǵaityn kópir jarylyp, birneshe beton joly qiraǵan. Batys basylymdary bul soqqy Resei prezidenti Vladimir Pýtinniń jeke ózine qatty tiedi dep boljaǵan.
Buǵan deiin Resei biligi "Qyrym kópirine shabýyl jasalsa, jaýap aýyr bolatynyn" birneshe ret málimdegen.
