Kievke shabýyl jasaǵan Reseidiń kamikadze drony, 17 qazan 2022 jyl
Kiev meri Vitalii Klichko dúisenbi kúni tańerteń Ýkraina astanasyna kamikadze dron shabýyl jasaǵanyn habarlady. Birneshe ǵimarat zaqymdanǵan, zardap shekkender týraly ázirge aqparat joq, dep jazady Azattyq.
Klichkonyń sózine qaraǵanda, Kiev ortalyndaǵy Shevchenko aýdanynda birneshe jarylys bolyp, turǵyn úiler qiraǵan. Bir úidiń astynda adam qalǵan.
Turǵyn úilerge túsken bomba týraly videony Ýkraina prezidenti Vladimir Zelenskii de jariialady. Ol "jaý beibit halyqqa terror jasady" dep jazǵan.
Munan ózge "Ýkrenergo" kompaniiasynyń keńsesine de soqqy jasalǵan. Taǵy bir bomba temirjol vokzaly mańyna túsken.
Klichko drondardyń birinen qalǵan synyqtyń sýretin jariialady. Onda "Geran-2" degen jazý bar. Resei Irannyń Shahed-136 kamikadze dronyn osylai ataidy.
Dúisenbi tańerteń kamikadze dron Odessa qalasyna da soqqy jasaǵan. Qala infraqurylymyna ziian keltirgen, ázirge egjei-tegjeili aqparat joq.
Harkovte 17 qazanda tańerteń metro men jer ústindegi elektr kólikteri jumysyn toqtatqan, Harkov pen Harkov oblysynyń birqatar aýdandarynda jaryq sóngen. Bul jóninde "Sýspilne" habarlady. Harkovke budan ózge soqqy jasalǵany týraly ázirge habar joq, munyń aldynda qalanyń energetika nysandary atqylanǵan edi.
Buǵan deiin kamikadze drondar Nikolaevqa shabýyl jasap, úlken órt shyqqan. Ýkraina farmatsevtika qoimasy men ónerkásip infraqurylymyna zaqym kelgenin habarlaǵan. Resei BAQ-tary janar mai qoimasy jaryldy dep jazǵan.
Resei Ýkraina qalalaryna Irannyń kamikadze drondarymen áldeneshe ret shabýyl jasaǵan. Qyrkúiekte Odessa men Odessa oblysyna birneshe soqqy bergen. 15 qazanda Zaporoje oblysynyń basshysy Aleksandr Starýh osy oblysqa kamikadze dron tórt soqqy jasaǵanyn málimdegen. Tamyz aiynyń sońynda The Washington Post basylym Resei Irannan Shahed-136 kamikadze dronyn ákele bastaǵanyn habarlaǵan. Iran men Resei bul habardy joqqa shyǵarǵan.
