كيەۆكە شابۋىل جاساعان رەسەيدٸڭ كاميكادزە درونى, 17 قازان 2022 جىل
كيەۆ مەرٸ ۆيتاليي كليچكو دٷيسەنبٸ كٷنٸ تاڭەرتەڭ ۋكراينا استاناسىنا كاميكادزە درون شابۋىل جاساعانىن حابارلادى. بٸرنەشە عيمارات زاقىمدانعان, زارداپ شەككەندەر تۋرالى ەزٸرگە اقپارات جوق, دەپ جازادى ازاتتىق.
كليچكونىڭ سٶزٸنە قاراعاندا, كيەۆ ورتالىنداعى شەۆچەنكو اۋدانىندا بٸرنەشە جارىلىس بولىپ, تۇرعىن ٷيلەر قيراعان. بٸر ٷيدٸڭ استىندا ادام قالعان.
تۇرعىن ٷيلەرگە تٷسكەن بومبا تۋرالى ۆيدەونى ۋكراينا پرەزيدەنتٸ ۆلاديمير زەلەنسكيي دە جارييالادى. ول "جاۋ بەيبٸت حالىققا تەررور جاسادى" دەپ جازعان.
مۇنان ٶزگە "ۋكرەنەرگو" كومپانيياسىنىڭ كەڭسەسٸنە دە سوققى جاسالعان. تاعى بٸر بومبا تەمٸرجول ۆوكزالى ماڭىنا تٷسكەن.
كليچكو درونداردىڭ بٸرٸنەن قالعان سىنىقتىڭ سۋرەتٸن جارييالادى. وندا "گەران-2" دەگەن جازۋ بار. رەسەي يراننىڭ Shahed-136 كاميكادزە درونىن وسىلاي اتايدى.
دٷيسەنبٸ تاڭەرتەڭ كاميكادزە درون ودەسسا قالاسىنا دا سوققى جاساعان. قالا ينفراقۇرىلىمىنا زييان كەلتٸرگەن, ەزٸرگە ەگجەي-تەگجەيلٸ اقپارات جوق.
حاركوۆتە 17 قازاندا تاڭەرتەڭ مەترو مەن جەر ٷستٸندەگٸ ەلەكتر كٶلٸكتەرٸ جۇمىسىن توقتاتقان, حاركوۆ پەن حاركوۆ وبلىسىنىڭ بٸرقاتار اۋداندارىندا جارىق سٶنگەن. بۇل جٶنٸندە "سۋسپٸلنە" حابارلادى. حاركوۆكە بۇدان ٶزگە سوققى جاسالعانى تۋرالى ەزٸرگە حابار جوق, مۇنىڭ الدىندا قالانىڭ ەنەرگەتيكا نىساندارى اتقىلانعان ەدٸ.
بۇعان دەيٸن كاميكادزە دروندار نيكولاەۆقا شابۋىل جاساپ, ٷلكەن ٶرت شىققان. ۋكراينا فارماتسەۆتيكا قويماسى مەن ٶنەركەسٸپ ينفراقۇرىلىمىنا زاقىم كەلگەنٸن حابارلاعان. رەسەي باق-تارى جانار ماي قويماسى جارىلدى دەپ جازعان.
رەسەي ۋكراينا قالالارىنا يراننىڭ كاميكادزە دروندارىمەن ەلدەنەشە رەت شابۋىل جاساعان. قىركٷيەكتە ودەسسا مەن ودەسسا وبلىسىنا بٸرنەشە سوققى بەرگەن. 15 قازاندا زاپوروجە وبلىسىنىڭ باسشىسى الەكساندر ستارۋح وسى وبلىسقا كاميكادزە درون تٶرت سوققى جاساعانىن مەلٸمدەگەن. تامىز ايىنىڭ سوڭىندا The Washington Post باسىلىم رەسەي يراننان Shahed-136 كاميكادزە درونىن ەكەلە باستاعانىن حابارلاعان. يران مەن رەسەي بۇل حاباردى جوققا شىعارعان.
