Resei Qazaqstanǵa Sladkoe kólin syiǵa tartty dep týra aitýǵa bolmaidy. Bul týraly QR SIM baspasóz qyzmetiniń jetekshisi Ánýar Jainaqov málimdedi, - dep habarlaidy kaz.tengrinews.kz.
"Birinshiden, Resei Qazaqstanǵa kól syilady deý oryndy emes. Óitkeni kóldiń bir jaǵy baiaǵydan Qazaqstan aýmaǵyna kiredi. Shekara 2005 jyldyń 18 qańtaryndaǵy kelisim boiysha ornatylǵan. Atalǵan aimaqqa shekaralyq belgiler ornatyldy. Bul aýmaqta eshqandai aiyrbas bolǵan joq", - deidi Jainaqov.
Novosibir oblysyndaǵy Kýpino aýdan ortalyǵynan 20 shaqyrym jerde ornalasqan Sladkoe kólin Qazaqstanǵa berý týraly aqparat Reseidegi Qazaqstan elshiliginiń saitynda 15 tamyzda jariialanǵan.
"Kýpin aýdanynyń basshysy Vladimir Shýbinkovtyń sózinshe, kóldiń bir jaǵy onsyz da Qazaqstan aýmaǵynda bolǵan, sondyqtan qalǵan bóligin jyljyta salý kerek boldy. Demarkatsiia 10 sáýirde aiaqtalǵan bolatyn. Demarkatsiiadan keiin Sladkoe kóli tolyqtai Qazaqstan aýmaǵyna kirdi", - delingen vedomstvo habarlamasynda.
Reseilik BAQ-tyń málimeti boiynsha, kólde jergilikti halyq jii demalatyn, qazir olarǵa shekaranyń ózgergeni týraly eskertý aitylyp jatyr. Reseidegi Qazaqstan elshiliginiń aqparaty boiynsha, kól sýy ziiansyz jáne emdik maqsatta paidaly eken.
"Sladkoe kóliniń sý quramynda - natrii iony, hlor, gidrokorbanattar, bor jáne ózge de mineraldy tuzdar bar. Sý óte jumsaq - quramy jaǵynan sabyndy sý siiaqty. Kól sýynda balyq joq. Kól sýy quramyna bailanysty qysta qatpaidy. Kól sýy men laiyn paidalanyp, teri, asqazan men ishek, parodontoz, allergiia, qimyl-tirek júiesiniń aýrýlaryn emdeýge bolady jáne immýnitet pen shashty kúsheitýge septesedi", - delingen saitta.
Sonymen qatar, birqatar reseilik BAQ-ta kól sýynyń paidasyz ekeni aitylǵan. "Bizdiń aýdanda Gorkoe kóli bar - mine ol emdik. Al Sladkoe kóli - jartylai kól, jartylai lai, múlde paidasyz", - dep keltiredi Kýpino aýdanynyń basshysy Vladimir Shýbinkovtyń sózin "NGS.Novosti" saity.
