Resei Joǵarǵy sotynda ádilet ministrliginiń "Iegova kýágerleri" dini uiymyna qarsy shaǵymy boiynsha sot otyrysy bastalatyn sát. Máskeý, 20 sáýir 2017 jyl.
Resei Joǵarǵy soty "Iegova kýágerleri" dini uiymyn ekstremistik uiym dep tanyp, Resei territoriiasyndaǵy qyzmetine tyiym saldy. Sot sheshimi Resei ádilet ministrliginiń shaǵymy boiynsha shyǵaryldy. Reseide zańdy túrde tirkelgen dini uiymdy ekstremistik uiym dep tanyǵan oqiǵa birinshi ret bolyp otyr.
Sot sheshimi eń aldymen "Iegova kýágerleriniń" Sankt-Peterbýrgtegi ákimshilik ortalyǵyna jáne uiymnyń el aýmaǵyndaǵy qyzmetine áser etedi.
"Iegova kýágerleri" qazir uiymnyń 170 myńǵa tarta ókili baryn aitady. Reseide bul uiymǵa onyń áskeri qyzmet, sailaýǵa qatysý jáne jalpy memlekettik bilikke qatysty ózgeshe ustanymyna bailanysty burynnan kúdikpen qaraityn.
Resei biligi "Iegova kýágerleri" dini uiymyn ekstremizmge qatysy bar degen kúdikpen qyzmetin ýaqytsha toqtatty. "Interfaks" agenttiginiń habarlaýynsha, ádilet ministrligi 16 naýryzda Joǵarǵy sotqa "Reseidegi Iegova kýágerleriniń basqarý ortalyǵyn" ekstremistik dep tanyp, qyzmetine tyiym salý jáne uiymdy joiý týraly talap-shaǵym túsirgen. Shaǵym 5 sáýirde qaralmaq.
"Iegova kýágerleri" ortalyǵynyń málimdemesinde ortalyq qyzmetine tyiym salý onyń jaqtastaryn dini senimi úshin, onyń ishinde Injildi birge oqyp, birge qulshylyq qylatyny úshin ǵana qylmystyq qýdalaýǵa ulasýy múmkin deidi.
AQSh memlekettiń departamenti 2016 jyly din ustaný erkindigi týraly jyl saiynǵy esebinde Reseide dini azshylyqty quraityn toptarǵa júieli túrde qysym kórsetiletinin, al bas prokýratýra "Iegova kýágerleri" dini uiymynyń barlyq 406 jergilikti dini birlestigi men 2500-den astam qaýymyn ekstremizmge qatysy bar degen aiyppen jabýdy talap etip jatqanyn málimdegen.
