Resei memlekettik dýmasyna Ýkrainany "terroristik memleket" dep taný jónindegi zań jobasy kelip tústi. Bul jóninde TASS agenttigi "Spravedlivaia Rossiia - Za pravdý" fraktsiiasynyń jetekshisi Sergei Mironovtyń sózderine silteme jasap habarlady. Zań jobasyn ázirlegen de osy fraktsiia eken.
Jobamen tanysyp shyqqan RIA Novosti agenttigi onda "terrorizmge demeýshilik" etken elderdi de "terroristik" dep taný jóninde bap baryn aitady. Atap aitqanda, Ýkrainaǵa áskeri kómek kórsetken elder. Mundai elderdiń tizimin jasaý Resei úkimetine tapsyrylǵan.
Qujatqa sáikes, "eldi mekenderge jarylys jasap, adam ómirine qaýip tóndirgen", "zańsyz qarýly qylmystyq top qurǵan", "Reseidiń territoriialyq tutastyǵyn buzǵan nemese soǵan úndegen" memleketter "terroristik" dep tanylady.
Zań jobasyna sáikes, "terroristik" dep tanylǵan eldermen Resei barlyq diplomatiialyq qarym-qatynasty úzedi. Sonymen birge sol eldiń azamattarynyń dúnie-múlki tárkilenedi.
