BUU Bas assambleiasy Ýkrainada júrgizip jatqan soǵys úshin Reseidi BUU Adam quqyǵy keńesinen shyǵaryp tastady, dep habarlaidy Azattyq radiosy.
Daýysqa shyǵarylǵan qararda Resei áskeriniń Ýkraina aýmaǵynda adam quqyǵyn óreskel buzǵany aitylady.
Reseidi keńesten alyp tastaýdy 93 el qoldaǵan, 24 el qarsy shyqqan. Qarsy daýys bergender ishinde Qytai men Qazaqstan bar. Úndistan bastaǵan 58 el qalys qalǵan. Qarardy qabyldaý úshin 193 eldiń qalys qalǵandarynan bólek úshten ekisi qoldap daýys berýi kerek edi. Reuters agenttiginiń jazýynsha, Resei qarardy qoldap daýys berýdi dostyqqa jat qadam dep qaraitynyn málimdegen.
Máskeý Ýkrainadaǵy beibit azamattarǵa qarsy agressiiasyn moiyndamai keledi.
Memleketti Adam quqyǵy keńesinen shyǵaryp tastaý sirek kezdesedi. Sońǵy ret mundai jaǵdai 2011 jyly bolǵan. Ol kezde keńesten Liviiany shyǵarǵan. Ol eldiń basshysy Mýammar Kaddafi úkimetke qarsy miting qatysýshylaryna zorlyq-zombylyq kórsetti dep aiyptalǵan.
Endi Resei keńes otyrystarynda sóz sóilep, daýys bere almaidy, biraq onyń diplomattary keńestegi debattarǵa qatysa alady. Reuters derekkózderiniń aitýynsha, Resei budan bylai BUU keńesine senimdi tulǵalary arqyly yqpal etýge kóshedi.
BUU Adam quqyǵy keńesiniń músheleri úsh jylǵa sailanady. Resei men Ýkraina Shyǵys Eýropa elderi arasynan 2021-2023 jyldar aralyǵyna sailanǵan.
Kiev túbindegi Býcha qalasy sáýirdiń basynda Resei áskerinen azat bolyp, qalada ondaǵan beibit azamattyń óltirilgeni málim boldy. Máiitter arasynda qoly artqa qaiyryla bailanǵandar da boldy. Qalada baýyrlastar ziraty da paida bolǵan. Ýkraina biligi 300-den astam beibit turǵynnyń opat bolǵanyn aitady. Álemdik qaýymdastyq bul qylmysty jasaǵan Resei áskeri dep otyr.
Resei Býchadaǵy beibit azamattardy óltirdi degen aiypty joqqa shyǵaryp, muny "Ýkrainanyń arandatýy" dep atady.
