Reseidiń jazany atqarý federaldyq qyzmeti (FSIN) oppozitsiialyq saiasatker Aleksei Navalnyidan 29 jeltoqsanǵa deiin vedomstvonyń Máskeýdegi bólimshesine jolyǵyp, tirkelýdi talap etti. Vedomstvo áitpese saiasatkerdiń shartty jazasy túrme jazasyna ainalýy múmkin dep eskertken.
Navalnyidyń advokaty Vadim Kobzev Twitter-de osylai dep jazdy.
Aita keteiik, Navalnyi qazir Germaniiada densaýlyǵyn túzep júr.
FSIN resmi saityndaǵy habarlamada Lancet jýrnalynyń 22 jeltoqsan kúngi maqalasyna siltep, Navalnyidyń 20 qyrkúiekte aýrýhanadan shyǵarylǵanyn atap ótken.
"Maqalaǵa sensek, A.A.Navalnyi "Sharite" klinikasynan 20 qyrkúiekte shyǵarylǵan, al 12 qazanǵa taman qulan-taza aiyqqan. Osylaisha shartty túrde sottalýshy sot mindettegen sharttardy oryndamai, qylmystyq-atqarý inspektsiiasy baqylaýynan jaltaryp júr" delingen habarlamada.
FSIN sottalýshynyń qylmystyq-atqarý inspektsiiasynan jaltaryp júrgeni rastalsa, shartty jazany túrme jazasymen almastyrý týraly sotqa ótinish túsire alatynyn da eskertken.
Al Navalnyidyń baspasóz hatshysy Kira Iarmyshtyń aitýynsha, 30 jeltoqsanda Navalnyidyń baqylaýda bolý merzimi aiaqtalady. Alaida FSIN sotqa ótinish túsirip, ótinishi qanaǵattandyrylsa, Navalnyiǵa shynymen túrmege qamalý qaýpi tónedi.
"Iv Roshe" degen atpen tanylǵan is boiynsha Navalnyi 2014 jyly 30 jeltoqsanda 3,5 jylǵa shartty túrde sottalǵan. Oǵan "alaiaqtyq" baby boiynsha aiyp taǵyldy. Navalnyi taǵylǵan aiypty joqqa shyǵardy. Ol istiń saiasilanǵanyn aitqan.
"FSIN "Lansettegi" maqalaǵa súiene otyryp, meni qamaýdy talap eteiin dep jatyr. Biraq keshirińiz, maqala meniń "Novichok" ýymen ýlanǵanym jaily bolatyn. Demek, memleket resmi deńgeide ýlanǵanymdy moiyndady. Endeshe qylmystyq is qaida?" dep jazdy Navalnyi.
Onyń aitýynsha, buǵan deiin Eýropanyń Adam quqyǵy jónindegi soty Navalnyidyń "Iv Roshe" isi boiynsha quqyqtary buzylǵanyn rastap, Reseidi ótemaqy tóleýge mindettegen.
Eýroodaq pen Resei arasynda koronavirýsqa bailanysty áýe qatynasy shektelgen, sol sebepti Navalnyidyń 29 jeltoqsanǵa deiin Máskeýge barýy teoriia júzinde de múmkin emes deidi keibir sarapshylar.
- Tamyz aiynda Tomskiden Máskeýge ushyp bara jatqan Navalnyidyń háli kúrt nasharlap, esinen tanyp qalǵan. Pilot ushaqty jol boiyndaǵy Omskige jedel qondyryp, áýejaiǵa shaqyrtylǵan jedel járdem qyzmeti Navalnyiǵa atropin dárisin berip, ony jergilikti aýrýhanaǵa jatqyzǵan. Eki kúnnen keiin es-tússiz jatqan Navalnyidy arnaiy meditsinalyq ushaqpen Berlinge alyp ketken. Berlinde alynǵan biologiialyq úlgiler Navalnyidyń "Novichok" ýymen ýlanǵanyn kórsetti. Bul nátijeni basqa táýelsiz zertteýler de rastaǵan. Resei prezidenti Vladimir Pýtin Navalnyida elden shyǵýǵa shekteý baryn aityp, ony shetelge emdeýge jiberýge jeke ózi atsalysqanyn aitqan. Al Navalnyi shartty jazaǵa qaramastan ózinde shekteý joǵyn aitqan.
- FSIN súiengen Lancet jýrnalyndaǵy maqalada Navalnyidyń "qulaq-taza aiyǵyp ketkeni" aitylmaǵan - 12 qazanda saiasatkerde nevropotologiia-psihosomatikalyq aýytqýshylyqtar bilinbedi dep jazylǵan.
