Foto: Roskosmos
Resei «Baiqońyr» keshenindegi 234 nysandy Qazaqstanǵa qaitarmaq. Bul jaiynda Senat depýtattarynyń saýalyna Premer-Ministr Oljas Bektenovtiń jaýabynda aitylǵan, dep habarlaidy «Ult aqparat» Kazinform-ǵa silteme jasap.
«2022 jylǵy 2 jeltoqsandaǵy «Baiqońyr» kesheni boiynsha úkimetaralyq komissiianyń 8-shi otyrysynyń hattamasyn oryndaý aiasynda Resei tarapy jalǵa alýshylar quramynan shyǵarýǵa usynylatyn 234 obektiniń tizbesin usyndy. Olardyń bazasynda 300-ge jýyq jańa jumys ornyn qura otyryp, óndiristerdi uiymdastyrý josparlanyp otyr», - dep atap ótedi Úkimet basshysy jaýabynda.
Onyń atap ótýinshe, ǵarysh salasy investitsiialardy memlekettik qoldaý aiasynda basym salaǵa jatqyzylǵan. Úkimettiń 2016 jylǵy 14 qańtardaǵy № 13 qaýlysymen bekitilgen investitsiialyq jobalardy iske asyrý úshin basym qyzmet túrleriniń tizbesine ǵarysh apparattaryn, júielerin óndirý, jóndeý, tehnikalyq qyzmet kórsetý siiaqty qyzmet túrleri jatqyzylǵan.
«Týrizmdi damytý maqsatynda 2023 jylǵy qyrkúiekte «Baiqońyr» kesheni boiynsha úkimetaralyq komissiianyń 9-shy otyrysynda berilgen tapsyrmalardy iske asyrý úshin taraptar onyń bazasynda ǵarysh tehnikasynyń úlgileri men maketterin ornalastyra otyryp, mýzei keshenin qurý úshin «Gagarinskii start» 1-shi jáne 2-shi alańyn odan ári paidalaný jóninde usynystar ázirleidi. «Zenit-M» ǵaryshtyq zymyran kesheni nysandarynyń týristik tartymdylyǵyn jaqsartý úshin týr baǵdarlamasy ázirlendi. Zymyran qozǵaltqyshtary, «Soiýz-5» zymyranynyń maketi ornatyldy, kiiz úi ornatylyp «Etnoaýyl» ekspozitsiiasy jáne taǵy basqalary jasaldy. Budan basqa, «Baiqońyr» kesheniniń «Krainii» áýeailaǵynyń áýe keńistigin paidalaný jáne keshende turaqty áýe qatynasyn qalyptastyrý maqsatynda Qazaqstan men Resei úkimetteri arasynda memlekettik organdar men akkredittelgen uiymdardyń kelisiminde turǵan Kelisimniń jobasy ázirlendi», - dedi Premer-Ministr.
