Resei bas múftii Talǵat Tadjýddin Muhammed paiǵambar karikatýrasyna bola jaýlasýdyń qajeti joq dep sanaidy. Onyń pikirin RBK saity jariialady.
"Bireý bir nárseni salyp qoiypty dep túkke turmaityn nárse úshin soǵys jariialap, jaýlasýdyń qajeti joq - mundai isti Qudai da, Qudai elshisi de, Qudaiǵa senetin adamdar da jaratpaidy, bul - tabiǵilyqqa, ómirge jat nárse" dedi bas múfti.
Onyń sózine qaraǵanda, Muhammed paiǵambar "kek qaitarýdy eshqashan nasihattamaǵan jáne keshirimdi joǵary baǵalaǵan".
Ol Frantsiia prezidenti men ony jaqtaǵan frantsýzdardy "barsha musylmannyń jaýy" dep ataǵan Sheshenstan múftiiniń sózin jeke pikiri dep qabyldaý qajettigin aitty.
16 qazanda Parijde sabaq kezinde oqýshylarǵa Muhammed paiǵambar karikatýrasyn kórsetken 47 jastaǵy mektep muǵalimi Samiýel Pati kisi qolynan qaza tapty.
Osydan soń Frantsiia prezidenti Emmanýel Makron shabýyldy "islamister teraktisi" dep atap, zaiyrly qoǵam qundylyqtaryn qorǵaýǵa shaqyrǵan. Makron málimdemesi birqatar musylman elderinde narazylyq týǵyzdy. Makronnyń saiasi islam jaily málimdemesin Túrkiia prezidenti Rejep Taiyp Erdoǵan "islamdy qorlaý" dep baǵalap, frantsýz ónimderine boikot jariialaǵan. Sheshenstan basshysy Ramzan Qadyrov Makronnyń "qylmyskerden júz ese jaman" ekenin aitsa, Sheshenstan múftii ony "barsha musylmannyń jaýy" dep ataǵan.
Qadyrov sózine túsinikteme bergen Resei prezidentiniń baspasóz hatshysy Dmitrii Peskov jáne Resei liberal-demokratiialyq partiiasynyń jetekshisi Vladimir Jirinovskii sýbekt basshylary syrtqy saiasatpen aralaspaýy tiis dep málimdegen. Peskovqa jaýap qatqan Qadyrov "bul taqyrypty oǵan jeke túsindirýdiń qajeti joq" dep, Jirinovskiiden keshirim suraýdy talap etken.
