Resei AQSh diplomatiialyq missiiasynyń 10 qyzmetkerin elden shyǵaryp, Amerikanyń 15 sáýirde salǵan sanktsiiasyn dál solai qarymta qaitarady. Resei memlekettik dýmasynyń halyqaralyq ister komitetiniń tóraǵasy Aleksei Chepa "Interfaks" agenttigine bergen suhbatynda osylai dedi.
"Biz de olar siiaqty on qyzmetkerdi shyǵaramyz, onyń ústine bizdiń ishki isimizge shynymen aralasqan kompaniialarǵa taǵatyn kinámiz jetkilikti. Olarǵa qatysty da laiyqty sharalar qoldanylady" dedi ol.
Onyń aitýynsha, bul "halyqaralyq ahýaldy jaqsartpaidy", biraq Resei sonda da mundai qadamǵa barýǵa májbúr. "Árine, Amerikadaǵy rýsofobiia lobbii mashinasyn toqtatpaq emes" dedi Chepa.
"AQSh-taǵy 2020 jylǵy prezident sailaýyna yqpal etýge tyrysqany úshin jáne jalǵan aqparat taratý áreketi úshin" Vashington Reseidegi 32 zańdy jáne jeke tulǵaǵa jańa sanktsiia salǵanyn 15 sáýirde jariialaǵan. AQSh prezidenti Djo Baidenniń jarlyǵymen Reseidiń Vashingtondaǵy elshiliginde jumys isteitin on qyzmetkerdi shyǵaryp jiberý kózdelgen.
Munyń aldynda Resei prezidenti Vladimir Pýtinniń kómekshisi Iýrii Ýshakov AQSh elshisi Djon Sallivanǵa Amerika jańa sanktsiia salýdy toqtatýy kerektigin, bolmasa Resei "batyl qadamǵa barýǵa" májbúr bolatynyn aitqan.
