Shymkentte Reseiden zańsyz ákelingen taýyq jumyrtqalarynyń iri partiiasyn satý áreketi anyqtalyp, ónim tolyqtai joiyldy, dep habarlaidy ult.kz.
Zań buzýshylyq QR Aýyl sharýashylyǵy ministrliginiń Veterinariialyq baqylaý jáne qadaǵalaý komiteti, qalalyq Saýda jáne tutynýshylardyń quqyqtaryn qorǵaý departamenti jáne Qazaqstan qus ósirýshiler odaǵy júrgizgen birlesken baqylaý sharalary kezinde anyqtalǵan.
Tekserý barysynda «Jibek joly» bazarynda mindetti tańbalaýy joq ári veterinariialyq ilespe qujattarsyz satylymǵa shyǵarylǵan jumyrtqalar tabyldy.
Mamandardyń málimetinshe, jalpy sany 11 850 dana jumyrtqa tárkilengen. Zerthanalyq saraptama nátijesinde ónimniń qaýipsizdik talaptary men qoldanystaǵy zańnama normalaryna sáikes kelmeitini belgili bolǵan.
Osyǵan bailanysty tárkilengen ónim arnaiy komissiianyń qatysýymen belgilengen tártip boiynsha joiyldy.
Zań buzýshylyqqa qatysy bar tulǵalarǵa qatysty ákimshilik is qozǵalyp, materialdar quzyrly memlekettik organdarǵa joldandy.
Mamandardyń aitýynsha, elimizde engizilgen shekteýlerge qaramastan Reseiden ákelingen tańbalanbaǵan jumyrtqalardy zańsyz satý derekteri áli de kezdesedi. Osyǵan bailanysty respýblika boiynsha bazarlar men saýda oryndarynda baqylaý sharalary jalǵasýda.
Eske salsaq, 2026 jylǵy 17 sáýirden bastap Qazaqstan aýmaǵyna taǵamdyq taýyq jumyrtqalaryn importtaýǵa ýaqytsha tyiym engizilgen. Bul shara kóleńkeli importtyń aldyn alýǵa, dempingtik saýdany shekteýge jáne ishki naryqtaǵy baǵa turaqtylyǵyn saqtaýǵa baǵyttalǵan.
