Reforma jónindegi referendým Ekinshi Respýblika qurýǵa quqyqtyq negiz qalyptastyrady. Mundai pikirdi QR Memlekettik hatshysy Erlan Qarin bildirdi, dep habarlaidy QazAqparat.
«Búgin Prezident el Konstitýtsiiasyna ózgerister engizý jobasy boiynsha respýblikalyq referendým ótkizý týraly Jarlyqqa qol qoidy . Bul - Memleket basshysynyń airyqsha saiasi mańyzy bar mańyzdy sheshimi. Konstitýtsiialyq reforma jónindegi referendým bul - prezidenttik saiasi reformalar baǵdarlamasyn júzege asyrýdyń kezekti kezeńi. Baǵdarlama júieli sipatqa ie jáne sýperprezidenttik modelden prezidenttik respýblikaǵa túbegeili kóshýdi, birqatar biliktik ókilettikterdi qaita bólýdi, Parlamenttiń róli men mártebesin kúsheitýdi, halyqtyń eldi basqarýǵa qatysýyn keńeitýdi, azamattardyń quqyqtaryn qorǵaýdaǵy konstitýtsiialyq tetikterdi kúsheitýdi qamtidy», - dedi Erlan Qarin.
Memlekettik hatshynyń atap ótýinshe, bul reformalar qoǵam men sarapshylardyń suranysy men usynysyna negizdelgen.
«Bul jolǵy Qazaqstandaǵy referendýmnyń ereksheligi Prezident óziniń ókilettigin keńeitý úshin emes, kerisinshe biliktiń basqa institýttarymen ony qaita bólisýge bastamashylyq jasaýynda. Osylaisha, konstitýtsiialyq reforma jónindegi aldaǵy referendým Ekinshi Respýblikaǵa – memleket pen qoǵam ózara qarym qatynasyna jańa, barynsha tiimdi ári teńgerimdi modeline quqyqtyq negiz qalyptastyrady», - dedi Erlan Qarin.
