Foto: SIM baspasóz qyzmetinen
Japoniia men Koreia Respýblikasynda turatyn Qazaqstan Respýblikasynyń azamattary elimizdiń Konstitýtsiiasyna ózgerister men tolyqtyrýlar engizý jónindegi jalpyulttyq referendýmda ózderiniń daýys berý quqyǵyn alǵashqylardyń biri bolyp paidalandy, dep habarlaidy Syrtqy ister ministrligi baspasóz qyzmeti.
"Tokio qalasyndaǵy №261 ýchaske jergilikti ýaqyt boiynsha tańǵy saǵat 7-de (Nur-Sultan ýaqyty boiynsha saǵat 4:00-de) Qazaqstan Respýblikasynyń azamattary úshin óz esigin ashty. Alǵashqy minýttardan bastap qazaqstandyqtar ózderiniń «Jańa Qazaqstandy» qurýǵa qatysýǵa azamattyq quqyqtaryn iske asyrý úshin aitarlyqtai belsendilik tanytyp jatyr.
Referendýmda daýys bergen alǵashqy qazaqstandyq Tokio qalasyndaǵy jaqynda 18 jasqa tolǵan jas sailaýshy Alijan Saliev boldy. Bul onyń alǵashqy sailaýy jáne ol óziniń osy quqyǵyn qýana paidalandy" delingen habarlamada.
«Men jaqynda 18 jasqa toldym jáne osyndai tarihi oqiǵaǵa alǵash ret qatysý men úshin óte qyzyqty. Oǵan qosa bul - úlken jaýapkershilik, óitkeni meniń daýysym da Konstitýtsiiany jańartýda eskeriletin bolady. Men Qazaqstannyń Japoniia siiaqty damyǵan elge ainalǵanyn qalaimyn», - dedi Alijan.
Qazaqstandyqtar Tokioǵa Japoniianyń ár túkpirinen, sonyń ishinde Hirosima, Osaka jáne Kioto siiaqty alys prefektýralardan da daýys berýge kelip jatyr.
Al Ońtústik Koreia astanasyndaǵy №258 ýchaskege alǵash bolyp qazaqstandyq otbasy Kákim Danabaev pen Arýna Jánibek keldi. Olar Seýlde 10 jyldan astam ýaqyt turyp, biznespen ainalysady.
«Men korei seriktesterimmen biznes júrgizemin. Olardyń óz elindegi jaǵdaidy qalai talqylaityndaryn, saiasi ómirge belsendi qatysatynyn jii kóremin. Sondyqtan sońǵy 10 jyl ishinde men birde-bir sailaýdy ótkizip alǵan joqpyn. Bul joly da óz daýysymdy berýge keldim, óitkeni referendýmǵa qatysý bizdiń azamattyq paryzymyz. Bizdiń daýysymyz - balalarymyzdyń bolashaǵy», - dedi kásipker.
Kákim Danabaev Ońtústik Koreiadaǵy Haniang ýniversitetiniń doktorantýrasyn bitirgen. Qazir «Kazmedikor» atty qazaqstandyq-korei kompaniiasynyń teń quryltaishysy. Qazaqstan elshiligi osy otbasyǵa referendýmǵa qatysqany úshin alǵysyn bildirdi jáne birinshi sailaýshylar retinde syilyq tabystady.
"Qazaqstan azamattarynyń Japoniia men Koreia Respýblikasyndaǵy belsendiligi otandastarymyzdyń Qazaqstan Respýblikasynyń Prezidenti Q.Toqaev usynǵan saiasi jáne áleýmettik-ekonomikalyq reformalardyń mańyzdylyǵyna úlken mán beretindiginiń aiqyn dáleli.
Daýys berýshiler olardyń daýysy «Jańa Qazaqstandy» qurýda mańyzdy ról atqaratynyna senim bildirdi.
QR SIM usynysy negizinde Nur-Sultan qalasynyń aýmaqtyq sailaý komissiiasy 52 shet memlekette 65 sailaý ýchaskesin ashty. Olardyń meken-jailaryn silteme boiynsha kórýge bolady" delingen habarlamada.
