Sońǵy birneshe kún ishinde dosym, áriptesim Rasýl Jumalyǵa qarsy keshendi shabýyl jasalyp jatyrǵanyn barlyqtaryńyz kórip te, baiqap ta júrgen bolarsyzdar. Soǵan orai, ózimniń kózqarasymdy bildirgim kelip otyr.
1. Shabýyldyń basty sebebi - Rasýldyń osyǵan deiingi Ekinshi dúniejúzilik soǵys, Jeńis kúnine qatysty tyń oilary sebep boldy dep sanaimyn.
2. Shabýyldyń maqsaty - Rasýldy adam, azamat, sarapshy, maman retinde qaralaý bolyp tabylady. Shabýyldyń taǵy bir maqsaty atalmysh kitapty jariialaýǵa muryndyq bolǵan Erlan Qarin dosymyzdy qaralaý, oǵan kúie jaǵý.
3. Endi aiyptardyń mánisine kelsek, Rekeń mán-jaidy óz paraqshasynda aityp shyqty. Oǵan alyp qosarym joq.
Alaida mynany basa aitqym kelip otyr.
Rasýl óte adal, jumysyna, ómirine, sózi men isine asqan printsippen, kirpiiazdyqpen qaraityn tulǵa. Atyshýly kitabynyń dúniege qalai kelgenin, qandai izdenispen kelgenin bir adamdai bilemin. O basta mynadai tańdaý turǵan bolatyn; ia ǵylymi monografiia jazý, ia kópshilikke arnalǵan, aǵartýshylyq baǵyttaǵy sholý kitap shyǵarý. Shynyn aitaiyn, "Reke, jalpy bizdiń elde Arab álemine qatysty kóptegen jańsaq pikir bar. Kópshilik oqityn, keń kólemdi kitap joqtyń qasy. Bolashaqta talai monografiia kele jatar, qazir kópshilikke arnalǵan dúnie kerek" dep úgittegenderdiń biri men edim. Meniń oiymsha, Rasýl óz aldyna qoiǵan maqsatyn tolyq oryndady.
"Arabskii pasians" degen kitaby qalyń jurtqa jolyn tapty. Ishinde arab álemine qatysty kóptegen aqparat bar sholý kitap. Árbir derekkózi týraly aqparat kitapty aiqyn, anyq kórsetilgen. Kitap janrynyń ózi árbir betke derekkózin kórsetý, siltemesin berý degendi kózdemeidi. Rasýl tek osy kitaptyń ǵana avtory emes. Talai ǵylymi dúnieni, monografiiany jazdy. Eshbirine eshkimniń aitar mini, taǵar aiyby joq dep oilaimyn.
Shabýyldy uiymdastyrýshylar ádeiilep osy kitapty nysana qylǵany da tegin emes. Aqparaty, deregi kóp kitapta tyrnaq astynan kir izdeitin adam qashan da qatelik taba alady. Asqan printsipke barsa, dál búgin aq elimizde jazylǵan ǵylymi dissertatsiia men ǵylymi kitaptyń barsha avtoryn ury-qary qylyp shyǵarýǵa bolady. Alaida olardyń biriniń de murtyn balta shappai otyr ǵoi...
Qysqasy, Ǵabitshe aitsaq, Rasýl halyq jaýy bolsa, men de halyq jaýymyn!
Rasýldy tolyq qoldaimyn! Oǵan, Erlanǵa qarsy jasalyp jatqan shabýyldy jalpy bir býynǵa, qazaq ultshyldaryna jasalyp jatqan shabýyl dep sanaimyn. Osyndai jaǵdaida dostarymdy qoldaý, qasynan tabylýdy ózimniń adam, dos, sarapshy retindegi boryshym, paryzym dep esepteimin.
Aidos Sarymnyń feisbýktaǵy jazbasynan
