Óskemende «Taza Óskemen» kommýnaldyq kásipornynyń burynǵy direktory men onyń orynbasary kásipkermen birge 61 million teńgeden astam qarajatty jymqyrǵany úshin jeti jylǵa sottaldy. Bul aqsha qala joldaryn kútip ustaýǵa bólingen, dep habarlaidy ult.kz.
Tergeý málimetinshe, kásiporyn jyl saiyn 1,5 milliard teńgeden astam somaǵa kelisimsharttar alǵan. Alaida burynǵy basshylar tanys kásipkerdiń kompaniialarymen qum, bitým jetkizý jáne basqa jumystardy oryndaý boiynsha toǵyz jalǵan kelisimshart jasasqan.
Is júzinde kásiporynǵa eshqandai material jetkizilmegen, qyzmetter de kórsetilmegen. Aqsha kompaniialardyń esepshottaryna aýdarylyp, keiin qolma-qol sheshilip, qatysýshylar arasynda bólingen.
Buǵan deiin aiyptalýshylar alaiaqtyq jasady dep tanylǵan. Alaida apelliatsiialyq sot qylmystyń saralanýyn ózgertip, olardy asa iri mólsherde senip tapsyrylǵan múlikti iemdenip alý nemese ysyrap etý jáne oǵan kómektesý boiynsha kináli dep tanyǵan.
Sot úsheýin de jeti jylǵa bas bostandyǵynan aiyrdy. Sondai-aq olarǵa memlekettik qyzmette laýazym atqarýǵa ómir boiyna tyiym salyndy.
Qarjylyq monitoring agenttiginiń málimetinshe, kúmándi jolmen alynǵan qarajatqa elitalyq turǵyn úi kesheninen páter, BMW X6 M jáne Subaru Forester avtokólikteri, sondai-aq jer ýchaskeleri satyp alynǵan. Bul múlikke tyiym salynǵan.
