Memlekettik rámizder – elimizdiń tarihynan syr sherte
otyryp, bizdiń halyqtyń ózine ǵana tán keremet qasietterin aishyqtap turýy
qajet. Sonymen qatar, rámizderde beinelengen simvoldar, belgili bir túsindirýdi
qajet etpeýi kerek dep oilaimyn. Mysaly, biz AQSh eltańbasynda kórsetilgen
jyrtqysh qustyń beinesi arqyly, basqaǵa emes, tek óz kúshine senetin qaitpas-qaisar
halyqtyń sipatyn elestetemiz, túsinemiz. Sol siiaqty bizdiń týymyzdyń aspan
tústes bolýy, qyran qustai erkindikti qalaityn, ulan-ǵaiyr jerge ie namysty
halyqtyń obrazyn sipattap tur.
Dál osy sekildi ánuranymyz shyrqalǵan kezde boiymyzdy bir erekshe kúi baýrap alyp, tula boiymyz shymyrlap, halqymyzdyń basynan keshirgen qiyn kúnder elestep, sony moiymai jeńip shyqqan halyq ekenimizdi oilap keýdemizdi maqtanysh kerneidi. Bul da ánuranymyzdyń naqty, halyqqa sai etip tańdalǵanynyń kýási. Sebebi, burynǵy ánuranymyzǵa qaraǵanda, qazirgi ánuranymyzdy jatqa bilmeitin adam joq desek qatelespeimiz. Eńbektegen sábiden eńkeigen qartqa deiin ánurannyń áýenin estigennen qoldaryn keýdesine qoiyp ándete jóneletinin bárimiz de kórip júrmiz.
Al eltańbaǵa keletin bolsaq, jastar arasynda júrgizilgen saýalnamanyń nátijesin estip kádimgidei oilanyp qaldym. Sebebi, kópshiligi eltańbada kórsetilgen simvoldardyń maǵynasyn durys túsindire almapty. Bul neni aitady?! Rámizderde kórsetilgen simvoldar sózsiz túsinilýi qajet. Ol eshqandai túsindirýdi, uǵyndyrýdy qajet etpeýi tiis. Sondyqtan, eltańbany elimizdiń tarihyna sai keletin nyshandarmen árlep, túsinikti etip qaita jasaýǵa qarsy emespin. Jastar rámizderdi jatqa sipattap berýi tiis. Qazaqtyń qazaqtyǵyn tanytatyn, sanada tez jattalyp qalatyndai tarihi estelikter, simvoldar bizde jetkilikti dep oilaimyn.
Raýan Kemerbai
Lev Gýmilev atyndaǵy EUÝ filosofiia kafedrasynyń dotsenti
Filosofiia ǵylymynyń kandidaty
