Elordadaǵy Ulttyq akademiialyq kitaphanada Qazaqstannyń eńbek sińirgen qairatkeri, «Parasat» ordeniniń iegeri, jazýshy-dramatýrg Rahymjan Otarbaevtyń «I byl ia podobiem tvoim» jáne «Plach Chingishana» kitaptarynyń tusaýkeseri ótti, dep habarlaidy "Ult aqparat".
Qos kitap Qazaqstannyń Reseidegi elshiligi qoldaýymen Máskeýdegi «Vostochnyi ekspress» baspasynan shyqqan. Tusaýkeserge belgili aqyn-jazýshylar, teatr jáne ádebiet synshylary, qoǵam, mádeni qairatkerler qatysty. Shara barysynda ádebiettanýshy Gúlzada Nietqalievanyń jazýshy shyǵarmashylyǵyna arnalǵan zertteý kitaby tanystyrylyp, foto kórme jáne sahnalyq qoiylymdar kórsetildi.
«Atyraý óńirinen delegatsiia bolyp kelip turmyz. Al Rahymjannyń óziniń týǵan jeri – Qurmanǵazy men Dinanyń, Ábý Sársenbaev pen Hiýaz Dospanovanyń, Jumeken Nájimedenov sekildi maqtanyshtarymyz ómirge kelgen meken. Rahymjan – qazaq halqy úshin uly tulǵa dep esepteimiz. Sebebi, onyń qalamynan shyqqan shyǵarmalary, dramatýrgiiasy búkil dúnie júzin sharlap ketti. Onyń eńbekteri Túrkiiada, Resei men Ońtústik Aziia elderinde jariialanǵan. Shetelderden shaqyrtý alyp, pesalary qoiylǵan. Rahymjan Otarbaev – dúnie júzinde óz baǵasyn alǵan belgili qalamger», - dedi Atyraý oblystyq qoǵamdyq keńestiń tóraǵasy Murat Óteshov.
Kitaptyń tanystyrylymna jazýshynyń jary - Sáýle Otarbaeva, uly - Ermerei men nemeresi Jahanger da keldi. Sáýle Otarbaevnyń aitýynsha, elordadaǵy Ulttyq akademiialyq kitaphana – jazýshynyń izi qalǵan jer. Jazýshynyń jary Rahymjan Otarbaevtyń kitaptaryn izdeýshi oqyrmandarynyń kóp ekenin aitady.
Al Rahymjan Otarbaevtyń shyǵarmashylyǵy týraly belgili ádebiettanýshy Amansheldi Keńshilik pikir bildirdi.
«Rahymjan Otarbaevtyń 1980 jyldardyń basynda «Soǵystyń sońǵy bombasy» atty «Jalyn» jýrnalynda alǵashqy áńgimesi jaryq kórgen bolatyn. Bul – sol kezeń úshin ádebiettegi úlken qubylys edi. Nege deseńiz, onda adam degen uǵymǵa múlde basqasha turǵydan qaraý, soǵys shyndyǵyna ózgeshe kózqaraspen úńilý bar. Sondaǵy Jazyl degen jigit soǵysqa barǵysy kelmei, aýylda jarylǵan bombadan qaza tabady. Moraldyq turǵysynan ony kinálaýǵa bolady. Al imani turǵydan biz ony kinálai almaimyz. Sebebi, fashist bolsyn, onyń qan tógýge qoly barmaidy. Sol kez úshin bul shyǵarmashylyq batyl sheshim. Mine, Rahymjan aǵamyz osyndai úlken sýretker», - deidi Amansheldi Keńshilik.
Avtordyń jekelegen shyǵarmalary buryn túrik, arab, qytai, nemis, aǵylshyn, ázerbaijan tilderine aýdarylǵan. «Sultan Beibarys», «Bas», «Nashaqor jaily novella», «Nurjaýǵan-ǵumyr», «Syrym batyr», «Mustafa Shoqai» jáne basqa ondaǵan shyǵarmalary teatrlarda sahnalanǵan.
Shyńǵys Aitmatov Rahymjan Otarbaevty «HHI ǵasyrdyń intellektýaldy prozasynyń úzdik ókili» dese, Ábdijámil Nurpeiisov «qazaq Chehovy» ataǵan.
