Belgili jýrnalist Rahat Mamyrbekti 22 jeltoqsan, juma kúni aqtyq saparǵa shyǵaryp salady. Bul týraly marqumnyń áriptesi, «Azattyq radiosynyń» qyzmetkeri Qýanyshbek Qari facebook áleýmettik jelisindegi jeke paraqshasynda jazdy, dep habarlaidy "Ult aqparat".
«Rahat áriptesimizdiń janazasy 22 jeltoqsan, juma kúni shyǵarylady. Ózi turǵan «Qulager» yqshamaýdany 42 úiden janazasy oqylyp, «Keńsai-2» ziratyna jerlenedi. 21 jeltoqsan kúni saǵat 19:00-de «Orxideia» kafesinde (Jansúgirov kóshesi, 260 V) qonaqasy beriledi. Juma kúngi jerleýden keiingi asy «Áýlet» saraiynda (Talǵar tas joly, Besaǵash aýyly) ótedi», - dep jazdy Qýanyshbek Qari.
Esterińizge sala keteiik, jeltoqsannyń 20-sy kúni «Azattyqtyń» qazaq redaktsiiasy Almaty biýrosynyń veb-redaktory, jýrnalist Rahat Mamyrbek qaitys boldy.
Azattyqtyń habarlaýynsha, jýrnalist 11 jeltoqsan kúni densaýlyǵy kúrt nasharlap, aýrýhanaǵa túsken jáne erteńine, tańerteń Almaty aýrýhanasynda kóz jumǵan.
Rahat Mamyrbek 1978 jyly 10 aqpanda Semei oblysy (qazirgi Shyǵys Qazaqstan oblysy) Aiagóz aýdany Tarbaǵatai aýylynda týǵan. Almaty memlekettik ýniversitetiniń filosofiia jáne saiasattaný fakýltetin bitirgen. Jýrnalistikadaǵy qyzmetin 2001 jyly «Qazaqstan» ulttyq telearnasynda, «Mezgil» aqparattyq-saraptamalyq baǵdarlamasynyń redaktory bolyp bastaǵan. Keiinirek, ár jyldary KTK, 31 arna jáne «Almaty» telearnalarynda jumys istegen. «Qazaqstan» telearnasynda jergilikti teleaýditoriiaǵa keń tanylǵan "Kúltóbe" telehabarynyń avtory ári moderatory bolǵan. 2010 jyldan beri «Azattyq» radiosynyń Almaty biýrosynda veb-redaktor bolyp qyzmet atqarǵan.
