Almaty qalasynda koronavirýs infektsiiasyn simptomsyz taratýshylar anyqtalyp, osyǵan bailanysty «Rahat» konditerlik fabrikasy karantinge jabyldy, dep habarlaidy QazAqparat.
Alǵashynda joǵary temperatýrasy bar 8 adam anyqtaldy. Sonymen birge 1450 qyzmetkerge test júrgizilgen. Osyǵan bailanysty QR Bas memlekettik sanitar dárigeriniń qaýlysyndaǵy talaptarǵa sáikes qyzmetkerler úi karantinine alyndy.
Fabrika ákimshiligi óz sheshimimen jumysty 15 maýsymǵa deiin toqtatqan. Aýdandyq taýarlar men qyzmetterdiń sapasy men qaýipsizdigin baqylaý basqarmalaryna epidemiiaǵa qarsy sharalar tolyǵymen aiaqtalǵansha fabrika jumysyn toqtatý týraly qaýly berildi.
«Kórip otyrǵandaryńyzdai, sizderdiń taraptan qaýipsizdik sharalarynyń qamtamasyz etilmeýi uiym qyzmetkerleri arasynda aýrýdyń taraýyna jáne nysannyń jumysyn toqtatýǵa alyp keldi. Personal men kelýshiler termometriiasy, áleýmettik qashyqtyqtyń saqtalýyn qamtamasyz etý, sanitaizer men dezinfektsiialyq quraldar qory bolýy kerek qoi. Sanitarlyq-epidemiologiialyq qaýipsizdik rejim sharalaryn qatań túrde saqtaýdy talap etemin. Maska taǵý rejimin saqtap, jeke qorǵanys quraldaryn (maska, qolǵap) aýystyryp turý óte mańyzdy», - dedi kásipkerlerge qarata aitqan sózinde Jandarbek Bekshin.
Monitoring tobynyń baqylaý sharalarynyń barysynda 11-12 maýsymda 120 kásipkerlik sýbekti tekserildi. Onyń ishinde 29-nan tártip buzý faktileri anyqtaldy: «Ainbulaq», «Qazyna», «Mizam», «Ójet», «Ásem», Nazar JK, «Sochi» bazarlary, «Úrimshi», «Ahaeva» JK ashanalary, «Stroi siti», «Alataý-2», «Jibek joly» MTTs, «Jibek-Joly» SÚ saýda ortalyqtary, «QOJAHMET» JK kantseliariialyq taýarlar dúkeni, «Kabýldinov» JK, «Asoev M.K.» JK azyq-túlik dúkenderi, «KOMPRESSOR» JShS, «M-Retail» JShS qosalqy bólshekter dúkeni, «Magnum Cash &Carry» JShS, «Sapsan» JShS meditsinalyq kompaniiasy, «Áliia», «Ásel» sulýlyq salondary, «Mesto vstrechi», «Prajechka», «Lýna», «Oscar cinema&karaoke», «Degirmen», «Istanbul», «light bar», «Almaty doner», «Tsentr shashlyka» dámhanalary.
«Maska rejiminiń saqtalmaýy, terige arnalǵan antiseptik pen dezinfektsiialyq quraldar, sanitaizerdiń joqtyǵy, dezinfektsiialyq týnnelderdiń jaramsyzdyǵy, temperatýra ólsheý tártibiniń saqtalmaýy, sonymen birge kireberiste aqparattyq habarlandyrýdyń joqtyǵy syndy kemshilikter anyqtaldy»,– dep qosty Bekshin.
Monitoring toby jumysyn bastaǵaly beri qala boiynsha 2 606 nysan tekserilip, onyń ishinde 194-nen Almaty qalasy bas memlekettik sanitar dárigeriniń qaýlysyndaǵy talaptar buzylǵany anyqtaldy. Soǵan bailanysty 94 nysannyń jumysy toqtatyldy.
