Parlament Senatynyń jalpy otyrysynda «TMD-ǵa qatysýshy memleketterdiń iadrolyq avariia nemese radiatsiialyq avariialyq ahýaldyń týyndaý jaǵdaiyna daiyndyqty jáne olardyń zardaptaryn joiý kezindegi ózara kómekti qamtamasyz etý boiynsha ózara is-qimyly týraly kelisimdi ratifikatsiialaý týraly» Zańy qabyldandy, dep habarlaidy QazAqparat.
Kelisim jobasy TMD Ekonomikalyq Keńesiniń 2018 jylǵy 14 maýsymdaǵy otyrysynda maquldanǵan jáne oǵan 2018 jylǵy 2 qarashada elordada TMD úkimet basshylary keńesiniń otyrysy aiasynda Qazaqstan Respýblikasynyń Premer-Ministri qol qoidy.
«Osy Kelisimdi ratifikatsiialaý iadrolyq avariia nemese radiatsiialyq avariialyq ahýal týyndaǵan jaǵdaida TMD-ǵa qatysýshy memleketter arasynda aqparat pen kómekti jedel usynýǵa múmkindik beredi.
Qujat TMD-ǵa qatysýshy memleketterdiń ýákiletti organdary arasyndaǵy ózara is-qimyldyń tiimdiligi men ónimdiligin arttyrýǵa, atom energiiasyn beibit maqsatta paidalanýǵa bailanysty kez kelgen yqtimal oqiǵalarǵa ýaqtyly den qoiýǵa baǵyttalǵan», - dedi Energetika ministri Nurlan Noǵaev.
Kelisimniń taraptary: Armeniia, Belarýs, Qazaqstan, Qyrǵyz, Ózbekstan, Tájikstan Respýblikalary jáne Resei Federatsiiasy.
Kelisim iadrolyq avariia nemese radiatsiialyq avariialyq ahýaldyń týyndaý jaǵdaiynda mamandandyrylǵan qutqarý qurylymdaryn, mamandardy, qural-jabdyqtardy, kólik quraldaryn jáne osy qurylymdardy tehnikalyq jaraqtandyrý úshin paidalanylatyn materialdardy transshekaralyq ótkizý rásimderin jeńildetýge múmkindik beredi.
«Qazaqstan Respýblikasynyń «Atom energiiasyn paidalaný týraly» Zańyna sáikes, atom energiiasyn paidalaný salasynda transshekaralyq avariialar nemese oqys oqiǵalar týyndaǵan jaǵdaida, Qazaqstan Respýblikasy ratifikatsiialaǵan halyqaralyq sharttarǵa sáikes ýákiletti organ azamattyq qorǵaý salasyndaǵy ýákiletti organmen birlesip, qulaqtandyrý jáne den qoiý jónindegi sharalardy qabyldaidy.
Osyǵan bailanysty Kelisim ratifikatsiialaý úshin Qazaqstan Respýblikasy Parlamentiniń Senatyna engizildi. Zań jobasyn qabyldaý keleńsiz áleýmettik-ekonomikalyq jáne ózge de saldarǵa ákep soqpaidy», - dedi ministr.
