Almaty oblysynda HQKO qyzmetkeri qyzmettik kólikpen 77 jastaǵy áieldi qaǵyp, oqiǵa ornynan ketip qalǵan. Jol apatynan aýyr jaraqat alǵan áiel kóz jumdy. Kólik júrgizgen 26 jastaǵy er adam keiin ustalyp, qamaýǵa alyndy, dep habarlaidy ult.kz.
Politsiianyń málimetinshe, qaiǵyly oqiǵa 11 tamyz kúni keshki ýaqytta Almaty – Shelek – Qorǵas – Báiseiit tasjolynda bolǵan. Aldyn ala aqparatqa sáikes, Kia Sorento kóligin basqarǵan júrgizýshi joldy belgilenbegen jerden kesip ótip bara jatqan 77 jastaǵy áieldi qaǵyp ketken.
Jol apatynan keiin júrgizýshi zardap shekken áielge kómek kórsetpesten, oqiǵa ornynan ketip qalǵan. Keiin politsiia onyń jeke basyn anyqtap, ustady. Qazir kúdikti qamaýda.
Áleýmettik jelide taraǵan aqparatqa sáikes, kólik tizgininde bolǵan er adam Almaty oblysyndaǵy HQKO qyzmetkeri bolǵan jáne jol apaty kezinde qyzmettik kólikti basqarǵan. Sondai-aq áleýmettik jelidegi jazba avtory filial basshylyǵy oqiǵany jasyrýǵa tyrysqanyn málimdegen.
Bul aqparatqa qatysty «Azamattarǵa arnalǵan úkimet» memlekettik korporatsiiasy túsinikteme berdi. Korporatsiia filial qyzmetkeriniń qyzmettik kólikpen jol apatyna túskenin rastady.
Oqiǵaǵa bailanysty qyzmettik tekseris júrgizilip, onda laýazymdy tulǵalardyń áreketi, ishki baqylaý deńgeii jáne qyzmettik kólikterdi paidalaný tártibi qaralǵan.
Tekserý qorytyndysynda filial direktory men onyń orynbasary tártiptik jaýapkershilikke tartyldy.
Filial direktorynyń jalpy máseleler jónindegi orynbasaryna qyzmettik kóliktiń paidalanylýyn tiisti deńgeide baqylamaǵany jáne qyzmettik aqparattyń tolyq ári shynaiy berilýin qamtamasyz etpegeni úshin tártiptik jaza qoldanylǵan.
Al filial direktory filial jumysyn basqarý jáne baqylaý, ishki baqylaý júiesin uiymdastyrý, sondai-aq mekeme múlkiniń saqtalýy men maqsatty paidalanylýyn qamtamasyz etý mindetterin tiisti deńgeide oryndamaǵany úshin jaýapqa tartyldy.
Memlekettik korporatsiia júrgizýshiniń qylmystyq jaýapkershiligi quqyq qorǵaý organdary men sottyń quzyretinde ekenin atap ótti.
«Júrgizýshiniń jaýapkershilik deńgeii men sipaty qylmystyq is pen sot talqylaýy aiasynda qoldanystaǵy zańnamaǵa sáikes anyqtalady», – dep málimdedi «Azamattarǵa arnalǵan úkimet».
Memlekettik korporatsiia qaza bolǵan 77 jastaǵy áieldiń týǵan-týystary men jaqyndaryna kóńil aitty.
