Qytai astanasy Beijińde Qytai Kommýnistik partiiasynyń qurylǵanyna 105 jyl tolýyna arnalǵan saltanatty jiyn ótip, memleket pen qoǵamnyń damýyna erekshe úles qosqan azamattarǵa partiianyń eń joǵary marapaty – «1 shilde» ordeni tabystaldy, dep habarlaidy ult.kz SSTV telearnasyna silteme jasap.
Biyl bul joǵary marapatqa segiz adam ie boldy. Olardyń qatarynda qazaq ultynyń ókili, dáriger Ýhas Súleimen de bar. Ol osy ordenge ie bolǵan alǵashqy qazaq retinde tarihqa endi.
Qytaidyń resmi málimetine sáikes, Ýhas Súleimen ómirin shekaralyq óńir turǵyndarynyń densaýlyǵyn qorǵaýǵa arnaǵan. Ol 40 jyldan astam ýaqyt boiy atpen jailaý men shalǵaidaǵy eldi mekenderdi aralap, qolynda dári qobdishasymen halyqqa meditsinalyq kómek kórsetip keledi. Dáriger aptap ystyq pen qaqaǵan aiazǵa qaramastan turǵyndarǵa qyzmet etýdi toqtatpaǵan.
Ýhas Súleimen Shyńjań-Uiǵyr avtonomiialyq aýdanyndaǵy Tarbaǵatai aimaǵyna qarasty Dórbiljin aýdandyq mal sharýashylyǵy aýrýhanasynda ishki aýrýlar bóliminiń bas dárigeriniń orynbasary qyzmetin atqarǵan.
1975 jyldan beri ol 100 myńnan astam naýqasty emdep, myńdaǵan aýyr háldegi adamnyń ómirin saqtap qalýǵa úles qosty. Sondai-aq 3200-den astam sábidiń dúniege kelýine kómektesken.
Aýyldyq densaýlyq saqtaý salasyn damytýǵa sińirgen eńbegi úshin buǵan deiin de Ýhas Súleimen «Ulttyq densaýlyq saqtaý júiesiniń úzdik qyzmetkeri», «Qytaidyń 1 mamyr eńbek medali» jáne «Ulttar birligi men progresiniń úzdik qairatkeri» sekildi memlekettik marapattarǵa ie bolǵan.
Aita keteiik, «1 shilde» ordeni – Qytai Kommýnistik partiiasynyń eń joǵary partiialyq marapaty. Ol 2017 jyly taǵaiyndalyp, ádette bes jylda bir ret eldiń áleýmettik-ekonomikalyq damýyna airyqsha úles qosqan partiia múshelerine beriledi. Búginge deiin bul marapatty 37 adam alǵan. Ýhas Súleimen – atalǵan ordenge ie bolǵan tuńǵysh qazaq.
