Qazaqstanda qazaq tiliniń jańa Orfografiialyq sózdigi ázirlenedi. Bul týraly vitse-prezident Erlan Qarin ǵalymdarmen kezdesýden keiin málimdedi, dep habarlaidy ult.kz.
Qarinniń aitýynsha, «qyrkúiek» sóziniń jazylýyna qatysty pikirtalas til mamandary men ádebi ortadan asyp, memlekettik apparattyń jumysyna da áser etedi. Sebebi qazaq tili keńse tiline ainalyp keledi.
«Qazaq tili – memlekettik til. Sondyqtan árbir sózdiń aitylýy men jazylýy memlekettik apparattyń kúndelikti jumysyna da tikelei qatysty», – dedi ol.
Vitse-prezident memleket belgili bir sózdiń qalai jazylatynyna aralaspaitynyn atap ótti. Bul – til mamandary men ǵalymdardyń mindeti. Al memlekettiń mindeti – osy jumysty tiimdi úilestirý.
Osyǵan bailanysty til saiasatyn júrgizetin mekemelerdiń basshylary men belgili ǵalymdar bas qosyp, jańa Orfografiialyq sózdik ázirleý týraly sheshim qabyldaǵan.
Aldymen belgili ǵalymdardan arnaiy jumys toby qurylyp, sózdik jobasyn daiyndaidy. Keiin eńbek mekemearalyq komissiianyń qaraýyna usynylyp, bekitiledi.
Qarinniń málimetinshe, qazaq tiliniń Orfografiialyq sózdigi sońǵy ret 2013 jyly jaryq kórgen. Sodan beri til qoldanysyna kóptegen jańa sózder engen.
«Bul iste asyǵystyq tanytýǵa bolmaidy ári sozyp júrýge de ýaqyt joq. Qazaqstan tarihynyń kóptomdyq akademiialyq jinaǵyn ázirlegendei, jańa Orfografiialyq sózdikke de ulttyq joba retinde qaraýǵa tiispiz», – dedi vitse-prezident.
