Astanadaǵy «Qyran» turǵyn úi keshenindegi jyljymaityn múlikti satý kezindegi alaiaqtyq is boiynsha tórt adam sottaldy. «International Invest Company IIC» JShS-niń tórt qyzmetkeri kináli dep tanylyp, 8 jyldan 9 jylǵa deiin bas bostandyǵynan aiyryldy, dep habarlaidy ult.kz.
Qarjylyq monitoring agenttiginiń Astana qalasy boiynsha departamenti júrgizgen tergeý barysynda sottalǵandardyń satyp alý-satý sharttarynyń ornyna zań boiynsha menshik quqyǵyn bermeitin brondaý sharttaryn, kepilaqy týraly kelisimder men aldyn ala sharttardy rásimdegeni anyqtaldy.
Kúdiktiler satý keńsesinde áleýetti satyp alýshylarǵa páterlerdiń maketterin, tehnikalyq pasporttaryn, senimhattar men kompaniianyń jyljymaityn múlikke quqyǵyn rastaityndai anyqtamalardy kórsetken. Osylaisha azamattardy mámileniń zańdy ekenine sendirip, páterlerdi, kommertsiialyq nysandardy jáne avtoturaqtardy naryq baǵasynan tómen baǵamen satyp alýdy usynǵan.
Jábirlenýshiler aqshany qolma-qol bergen nemese alaiaqtyq syzbaǵa qatysýshylardyń jeke shottaryna aýdarǵan. Bul qarjy «International Invest Company IIC» JShS-niń býhgalterlik jáne banktik qujattarynda kórsetilmegen.
Sonymen qatar sottalǵandar qurylys salýshy kompaniianyń qarajatyn iemdenýge baǵyttalǵan ekinshi alaiaqtyq syzbany iske asyrǵan. Olar kompaniia atynan klienttermen jalǵan satyp alý-satý sharttaryn jasap, jyljymaityn múlikke menshik quqyǵyn tirkegenimen, satýdan túsken aqshany kásiporynnyń kassasyna ótkizbegen.
Qarjylyq monitoring agenttiginiń resmi ókili Ernar Taijannyń aitýynsha, sot 35 jábirlenýshiniń jalpy somasy 2,2 mlrd teńgeden asatyn talaptaryn qanaǵattandyrǵan.
Sondai-aq «International Invest Company» JShS paidasyna 3,9 mlrd teńge óndirip alý týraly sheshim shyǵaryldy. Jábirlenýshilerge jalpy quny 1,3 mlrd teńge bolatyn 78 jyljymaityn múlik nysany berildi. Budan bólek, taǵy 73 nysan adal nietti satyp alýshylarǵa berilgen.
Úkim ázirge zańdy kúshine engen joq.
Buǵan deiin Astana prokýratýrasy «Qyran» turǵyn úi keshenine qatysty istiń sotqa joldanǵanyn habarlaǵan bolatyn.
