Semeidegi burynǵy "Pishevik" stadionynyń aýmaǵynan tabylǵan adam súiekterine qatysty jańa boljam aityldy. Qala turǵyny qańqa qaldyqtary segiz jyl buryn iz-túzsiz joǵalǵan ákesine tiesili bolýy múmkin ekenin málimdedi, dep habarlaidy ult.kz kznews.kz saityna siltep.
Birneshe kún buryn salynyp jatqan Jekpe-jek saraiynyń aýmaǵynda jer qazý jumystary kezinde adam qańqasynyń bólikteri tabylǵan. Osyǵan bailanysty nysandaǵy qurylys jumystary ýaqytsha toqtatyldy.
Merýert Núridenovanyń aitýynsha, ákesi joǵalar aldynda burynǵy stadionda kúzetshi bolyp jumys istegen. Ol kezekti jumys aýysymdarynyń birinen keiin úiine oralmai, sodan beri habar-osharsyz ketkender qatarynda bolǵan.
Stadion aýmaǵynan adam súiekteri tabylǵanyn estigen otbasy olardyń joǵalǵan týysyna tiesili bolýy múmkin dep kúdiktengen.
"Súiekter sol jerden tabylǵannan keiin, ákemizdiń de osy aýmaqta joǵalǵanyn eskerip, kúmán paida boldy. Endi saraptama qorytyndysyn kútemiz. Bizge bir-eki aidan keiin habarlasýdy aitty", – dedi Merýert Núridenova.
Ázirge tabylǵan súiekterdiń segiz jyl buryn joǵalǵan azamatqa tiesili ekeni rastalǵan joq. Qańqa qaldyqtary olardyń shyǵý tegin jáne shamamen qashan jerlengenin anyqtaý úshin sot-meditsinalyq saraptamaǵa jiberildi.
Semei qalalyq Politsiia basqarmasynyń ókili Saiat Sartov zertteý nátijesi shyqqannan keiin ǵana naqty qorytyndy jasaýǵa bolatynyn aitty.
Politsiia ókilderi adam súiekterine nemese basqa da kúmándi zattarǵa tap bolǵan azamattardy dereý quqyq qorǵaý organdaryna habarlaýǵa shaqyrdy. Mamandar kelgenge deiin tabylǵan zattardy ornynan qozǵaýǵa nemese óz betinshe qandai da bir áreket jasaýǵa bolmaidy.
