Qyzylorda oblysynyń Jańaqorǵan aýdanynda birneshe kún buryn joǵalyp ketken 20 jastaǵy jigittiń denesi qudyqtan tabyldy. Osy fakti boiynsha «Adam óltirý» baby boiynsha qylmystyq is qozǵalyp, marqumnyń 15 jastaǵy týǵan inisi kúdikke ilindi, dep habarlaidy ult.kz.
Astana telearnasynyń habarlaýynsha, 20 jastaǵy jigit úiiniń aýlasyna tósek salyp, túnegen. Tańerteń onyń joǵalyp ketkeni belgili bolǵan. Jaqyndary óz betterinshe izdeý júrgizip, bir táýlikten keiin jigittiń denesin úiinen shamamen 400 metr jerdegi jergilikti sý qubyrynyń qudyǵynan tapqan.
Marqumnyń týystary onyń denesinen kógergen izder men moinynda jipke uqsas belgi baiqaǵanyn aitqan. Kei aqparatta máiittiń kórpege oralǵan kúide tabylǵany kórsetilgen.
Quqyq qorǵaý organdary qylmysqa kúdikti retinde marqumnyń 15 jastaǵy týǵan inisin ustaǵan. Ol sot sanktsiiasymen qamaýǵa alynǵan.
Alaida marqumnyń ata-anasy tergeýdiń bul nusqasymen kelispeidi. Olardyń aitýynsha, jasóspirimniń aǵasyna qastandyq jasaǵanyna sený qiyn.
Otbasy buǵan deiin úiden aqsha urlanǵan jaǵdailar bolǵanyn aityp, qylmysqa basqa adamdardyń qatysy bolýy múmkin degen boljam jasaǵan. Týystary istiń jan-jaqty ári obektivti tergelýin talap etip otyr.
Qazir tergeý jalǵasyp jatyr. Oqiǵanyń naqty mán-jaiy men 20 jastaǵy jigittiń ólimine kimniń qatysy baryn tergeý anyqtaidy.
