Qostanaida belgisiz bireýler jergilikti balalar men jasóspirimderdiń sýretterin Telegram-arnaǵa jariialap, olardy qorlap, jazbalardy óshirý úshin aqsha talap etken. Ata-analar politsiiadan kinálilerdi taýyp, jaýapqa tartýdy surap otyr, dep habarlaidy ult.kz.
KTK arnasynyń málimetinshe, másele «Pozor Kostanaia» dep atalatyn Telegram-arnaǵa qatysty. Onda balalar men jasóspirimderdiń sýretteri jariialanyp, ar-namysyna tietin jazbalar jazylǵan.
Ata-analardyń aitýynsha, kei qyzdardan jariialanymdardy óshirý úshin aqsha suralǵan.
«Balalarymyzdy Telegram-arnalarǵa shyǵaryp jatyr. Qyzdardan aqsha suraǵan. Jariialanymdardy óshirý úshin aqsha talap etken», – deidi ata-analardyń biri.
Turǵyndardyń sózinshe, arnadaǵy jazbalardy óshirýdiń eki sharty qoiylǵan. Birinshisi – aty atalǵan bala taǵy bes bala týraly osyndai material jiberýi kerek. Ekinshisi – aqsha tóleý.
Kei jaǵdaida aqsha tólegen adamǵa jariialanymdy jibergen adamnyń jeke derekterin berýge ýáde etilgen.
Ata-analar bul áreketti ashyq túrde aqsha bopsalaý dep baǵalap, arna ákimshilerin anyqtap, jaýapqa tartýdy talap etip otyr. Olardyń aitýynsha, mundai jazbalardan kóptegen bala zardap shekken.
Politsiia bul jaǵdaidan habardar. Qazir oqiǵaǵa bailanysty tekserý júrip jatyr.
Qostanai qalasy politsiia departamenti qoǵamdyq qaýipsizdik bóliminiń bastyǵy Qairat Dáýrenbekovtiń aitýynsha, quqyq qorǵaý organdary oqiǵanyń barlyq mán-jaiyn anyqtap, qajetti materialdardy jinap jatyr.
«Qyzmetkerler oqiǵanyń barlyq mán-jaiyn anyqtap, qajet materialdardy jinap, tirkep jatyr. Sonymen qatar atalǵan materialdardy jariialaýǵa qatysy bar adamdar anyqtalýda. Osydan keiin olardyń áreketterine quqyqtyq baǵa beriledi», – dedi Qairat Dáýrenbekov.
Ata-analardyń aitýynsha, Telegram-arnaǵa jazylýshylar sany da artyp keledi. Qazir onyń aýditoriiasy 2 myń adamnan asqan.
