Qazaqstannyń eki iri banki integratsiia protsesin aiaqtady, dep habarlaidy "Ult aqparat" QazAqparat agenttigine silteme jasap.
Birikken banktiń málimdemesinde: «Qazaqstannyń Halyq banki» AQ jáne «Qazkommertsbank» AQ 2018 jylǵy 28 shildede 2018 jylǵy 27 shildedegi jaǵdai boiynsha Tabystaý aktisine qol qoidy», - delingen.
Atalǵan qujat eki bank arasyndaǵy erikti qaita uiymdastyrý aiasynda Qazkommertsbanktiń búkil quqyqtary men mindettemelerin Halyq bankine berýin bildiredi.
«Qazaqstannyń Halyq banki» AQ basqarma tóraǵasy Úmit Shaiahmetovanyń aitýynsha, bul protsess bir jarym jylǵa sozylǵan.
«Halyq banki men Qazkommertsbanktiń biryńǵai tehnologiialyq platformaǵa ótýi boiynsha búkil sharalar josparǵa sai aiaqtaldy. Halyq bankiniń jáne Qazaqstannyń búkil qarjy júiesiniń tarihynda jańa kezeń bastaldy», - deidi ol.
Habarlanǵandai, Tabystaý aktin bekitý týraly sheshim 2018 jyldyń 26 shildesinde Halyq banki aktsionerleriniń kezekten tys jalpy jinalysynda, Qazkommertsbank aktsionerleriniń kezekten tys jalpy jinalysynda jáne Qazkommertsbank jáne Halyq banki aktsionerleriniń birlesken jalpy jinalysynda qabyldandy.
Budan bólek, Halyq banki men Qazkommertsbank barlyq qajetti tehnologiialyq jumystardy aiaqtady. Sonyń nátijesinde Qazkommertsbank pen Halyq bankiniń klientterine endi Halyq bankiniń barlyq filialdary men bólimshelerinde qyzmet kórsetiledi. Kazkommertsbanktiń enshiles uiymdary Halyq bankiniń enshiles uiymdary bolady.
