Qazaqstannyń halyq ártisi, belgili kompozitor ári professor Bákir Baiahýnov dúnieden ótti, dep habarlaidy ult.kz.
Ómirin mýzyka ónerine arnaǵan kompozitor otandyq kásibi mýzykanyń damýyna zor úles qosty. Onyń týyndylarynda qazaq halqynyń dástúrli áýenderi, Shyǵys mýzykasynyń erekshelikteri men eýropalyq klassikalyq ónerdiń elementteri ózara úilesim tapqan.
Bákir Baiahýnov shyǵarmashylyq qyzmetimen qatar ustazdyq jolda da jemisti eńbek etti. Ol 40 jyldan astam ýaqyt Qurmanǵazy atyndaǵy Qazaq ulttyq konservatoriiasynda dáris oqyp, kóptegen talantty mýzykanttyń kásibi qalyptasýyna yqpal etti.
Mádeniet jáne aqparat ministrligi kórnekti óner qairatkeriniń ómirden ótýine bailanysty onyń otbasy men jaqyndaryna kóńil aitty.
“Bákir Baiahýnov shákirtterine bilim berip qana qoimai, ónerdiń shynaiy qundylyǵyn túsindirip, olardyń shyǵarmashylyq jolyna baǵyt-baǵdar kórsetti. Onyń bai shyǵarmashylyq murasy, ustazdyq ónegesi men jarqyn beinesi halyq jadynda máńgi saqtalady”, – delingen vedomstvonyń kóńil aitý habarlamasynda.
Aita keteiik, Juldyz Ómirǵali Aiqynmen qarym-qatynasy qalai bastalǵanyn aitty.
Bákir Baiahýnov kim?
Bákir Iahiiauly Baiahýnov – qazaqstandyq kórnekti kompozitor, professor, Qazaqstannyń halyq ártisi jáne óner qairatkeri. Ol 1933 jyly 15 qyrkúiekte Almaty qalasynda dúniege kelgen. Ortalyq Aziiadaǵy dúngen halqynyń tuńǵysh kásibi kompozitory retinde tanylǵan.
1960 jyly Qurmanǵazy atyndaǵy Almaty memlekettik konservatoriiasyn kompozitor Quddys Qojamiiarovtyń synyby boiynsha támamdaǵan. Keiin 1960–1963 jyldary Máskeý konservatoriiasynda bilimin jetildirgen. 1963 jyldan bastap Almaty konservatoriiasynda sabaq berip, 1991 jyly professor ǵylymi ataǵyn alǵan.
Kompozitor shyǵarmashylyǵynda qazaqtyń dástúrli mýzykasyn, dúngen halqynyń áýenderin jáne eýropalyq klassikalyq mýzykany ushtastyrǵan. Onyń belgili týyndylarynyń qatarynda “Kúi” simfoniiasy, “Qambar batyr”, “Ysqyrma”, “Shyǵys aýrasy” jáne “Qorqyt” simfoniialary bar. Sondai-aq birneshe filmge mýzyka jazyp, ǵylymi maqalalar men mýzykalyq zertteýler jariialaǵan.
Bákir Baiahýnov 1983 jyly Qazaq KSR-iniń eńbek sińirgen óner qairatkeri, al 1990 jyly halyq ártisi ataǵyn ielendi. Ol Qazaqstan Kompozitorlar odaǵy basqarmasy tóraǵasynyń orynbasary qyzmetin de atqarǵan. Uzaq jyldar boiy ustazdyq etip, otandyq mýzyka salasyna kásibi mamandar daiarlaýǵa úles qosty.
Derekkóz: Kompozitordyń ómirbaiany men shyǵarmashylyǵyna arnalǵan sait.
