«Qazgidromet» RMK 29 shildege arnalǵan daýyldy eskertý jariialady. Sinoptikterdiń boljamynsha, elimizdiń basym bóliginde qatty jáne óte qatty ystyq saqtalyp, kei óńirlerde naizaǵai, burshaq, daýyl men shańdy daýyl bolady, dep habarlaidy ult.kz.
Elordada 29 shilde kúni kúndiz ótkinshi jańbyr jaýyp, naizaǵai kútiledi. Soltústikten soǵatyn jeldiń ekpini sekýndyna 15 metrge deiin jetedi. Shymkentte soltústik-shyǵys jeli 15-20 m/s kúsheiip, kúndiz aýa temperatýrasy 40 gradýsqa deiin kóteriledi.
Sinoptikterdiń málimetinshe, 29-30 shildede Batys Qazaqstan men Atyraý oblystarynda, 29 shilde men 1 tamyz aralyǵynda Mańǵystaý oblysynda qatty jáne óte qatty ystyq saqtalady. Sonymen qatar 29-31 shilde aralyǵynda Qostanai, Aqtóbe jáne Ulytaý oblystarynda da aptap ystyq bolady.
29 shildeden 1 tamyzǵa deiin Soltústik Qazaqstan jáne Aqmola oblystarynda, al 2 tamyzǵa deiin Qyzylorda men Túrkistan oblystarynda qatty ystyq kútiledi. Osyǵan bailanysty atalǵan óńirlerdiń basym bóliginde joǵary jáne tótenshe órt qaýpi saqtalady.
Eń joǵary temperatýra Mańǵystaý oblysynda tirkelmek. Munda kúndiz aýa temperatýrasy 43-47 gradýsqa deiin kóteriledi. Atyraý men Aqtóbe oblystarynda 40-43 gradýsqa deiin óte qatty ystyq boljansa, Qyzylorda oblysynda 29-30 shildede 40-44 gradýs ystyq bolady. Sonymen qatar Qyzylorda oblysynyń ortalyǵy men shyǵysynda shańdy daýyl soǵyp, jeldiń ekpini 15-20 m/s-qa deiin kúsheiedi.
Shyǵys Qazaqstan, Abai, Soltústik Qazaqstan, Aqmola, Pavlodar, Qaraǵandy, Aqtóbe jáne Batys Qazaqstan oblystarynyń birqatar aýdandarynda jańbyr, naizaǵai, burshaq jáne daýyl kútiledi. Kei jerlerde jeldiń ekpini 20-25 m/s-qa deiin jetýi múmkin. Shyǵys Qazaqstan, Abai, Soltústik Qazaqstan jáne Qaraǵandy oblystarynyń jekelegen aýdandarynda tuman túsedi.
Almaty oblysynyń taý bókterinde jáne Jetisý oblysynyń taýly aýdandarynda ótkinshi jańbyr men naizaǵai boljanyp otyr. Ile Alataýynda, sondai-aq Jambyl jáne Túrkistan oblystarynda jeldiń ekpini 15-20 m/s, kei jerlerde 23-28 m/s-qa deiin kúsheiedi. Túrkistan oblysynyń batysy men soltústiginde shańdy daýyl kútiledi.
Sinoptikter turǵyndardy aýa raiynyń qolaisyzdyǵyna bailanysty saqtyq sharalaryn saqtaýǵa shaqyrady. Ásirese aptap ystyq kezinde kúnniń eń ystyq ýaqytynda syrtta uzaq júrmeýge, jetkilikti mólsherde sý ishýge jáne órt qaýipsizdigi talaptaryn qatań saqtaýǵa keńes beredi.
