Qazaqstan Ońtústik Koreianyń sheteldik jumysshylardy jumysqa ornalastyrýǵa múmkindik beretin EPS baǵdarlamasyna resmi túrde engizildi. El bul baǵdarlamaǵa qatysýshy 18-memleket atandy, dep habarlaidy ult.kz "Aq Jaiyq" basylymyna silteme jasap.
Qazaqstandyqtardy Ońtústik Koreiaǵa uiymdasqan túrde jumysqa qabyldaý 2028 jyldan bastalady dep kútilýde.
EPS júiesi shetel azamattaryna Ońtústik Koreiada memleketter arasynda belgilengen rásim boiynsha, beiresmi deldaldardyń kómeginsiz zańdy túrde jumys isteýge múmkindik beredi. Baǵdarlama E-9 jumys vizasy aiasynda júzege asyrylady.
Jumysshylardy qabyldaý bastalǵanǵa deiin Qazaqstan men Ońtústik Koreia úkimetaralyq memorandýmǵa qol qoiýy kerek. Sonymen qatar Qazaqstanda EPS-TOPIK ortalyǵy qurylyp, onda úmitkerlerdiń korei tilin bilý deńgeii tekseriledi.
Irikteý barysynda kandidattardyń kásibi bilimi men daǵdylary baǵalanyp, meditsinalyq tekserý júrgiziledi.
Jumysqa qabyldaý merzimi, tirkelý talaptary jáne qujat tapsyrý tártibi keiinirek Eńbek ministrliginiń resmi resýrstarynda jariialanady.
Vedomstvo ázirge Qazaqstan azamattaryn Ońtústik Koreiaǵa jumysqa qabyldaý bastalmaǵanyn eskertti. Sondyqtan «kepildi jumysqa ornalastyramyz» nemese irikteýden jedel ótkizemiz dep aqsha suraityn deldaldarǵa senbeý kerek.
Qazaqstandy EPS baǵdarlamasyna qosý týraly sheshimdi Ońtústik Koreia úkimeti 2026 jylǵy 14 tamyzda qabyldady. Qazaqstannyń baǵdarlamaǵa qosylý jónindegi jumysy 2023 jyldan beri júrgizilip kelgen.
