Qazaqstannyń Ulttyq qaýipsizdik komiteti Ońtústik Koreia azamattarynan quralǵan uiymdasqan qylmystyq toptyń 14 múshesin ustady. Keiin Ońtústik Koreianyń buqaralyq aqparat quraldary arnaiy operatsiianyń jańa mán-jaiyn jariialady, dep habarlaidy ult.kz.
UQK málimetinshe, sheteldikter telekommýnikatsiialyq júielerdi paidalanyp, uiymdasqan qylmystyq top quramynda alaiaqtyq jasady degen kúdikke ilingen. Olar 23 shildede qolǵa túsip, bul týraly resmi aqparat 30 shildede jariialandy.
Kúdiktilerdiń turǵylyqty jerlerine júrgizilgen tintý barysynda zańsyz áreketterde paidalanylǵan kompiýterler, noýtbýkter men uialy telefondar tárkilendi. Tergeý amaldaryn júrgizý jáne keiin elden shyǵarý maqsatynda olar ýaqytsha ustaý izoliatoryna qamaldy.
Ońtústik Koreialyq BAQ-tyń habarlaýynsha, kúdiktiler Qazaqstan aýmaǵynda koll-ortalyq uiymdastyryp, óz eliniń azamattaryna qońyraý shalǵan. Olar ózderin Ońtústik Koreianyń Qarjylai qadaǵalaý qyzmetiniń (FSS) ókilderi retinde tanystyryp, adamdardy aldaǵan.
Qazirgi málimet boiynsha, alaiaqtardyń áreketinen keminde 16 adam zardap shekken. Kúdiktiler jábirlenýshilerden jalpy somasy 600 millionnan astam ońtústikkoreialyq vondy (shamamen 435–450 myń AQSh dollary) iemdengen.
Yonhap News agenttiginiń málimetinshe, ustalǵan 14 kúdiktini Qazaqstannan Ońtústik Koreiaǵa kezeń-kezeńimen ekstraditsiialaý 27 shilde men 5 tamyz aralyǵynda júzege asyrylady. Inchhon áýejaiyna jetkizilgennen keiin olar birden tergeý organdaryna tapsyrylyp, resmi aiyp taǵylyp, sotqa deiingi tergeý bastalady.
Tergeý derekterine sáikes, Qazaqstanda ustalǵan top halyqaralyq deńgeide áreket etken iri qylmystyq jeliniń bir bóligi bolǵan.
Al SBS News telearnasynyń habarlaýynsha, birlesken operatsiia aiasynda Ońtústik Koreiada osy topqa qatysy bar taǵy bes adam ustalǵan. Budan bólek, ózge elderde jasyrynyp júrgen 19 kúdiktige halyqaralyq izdeý jariialanǵan.
Ońtústik Koreia biligi Qazaqstan UQK-men júrgizilgen birlesken jumysty joǵary baǵalap, shetelde otyryp qylmys jasaǵandardyń jaýapkershilikten qutyla almaitynyn málimdedi.
«Shetelde otyryp alaiaqtyq uiymdastyrsa, jazadan qutylýǵa bolady degen túsinik – qate. Azamattarymyzǵa shetelden ziian keltiretin kez kelgen qylmystyq top qai jerde jasyrynsa da, anyqtalyp, qyzmeti toqtatylady», – delingen Ońtústik Koreia tarapynyń málimdemesinde.
