Qazaqstanda 2026 jylǵy qyrkúiekte jyldyq infliatsiia 9,3% boldy. Bul tamyz aiyndaǵy kórsetkishpen salystyrǵanda 0,5 paiyzdyq tarmaqqa tómen, dep habarlaidy ult.kz.
Ulttyq statistika biýrosynyń málimetinshe, qyrkúiekte ailyq infliatsiia 0,6% deńgeiinde saqtaldy.
Jyldyq mánde azyq-túlikke jatpaityn taýarlardyń baǵasy 11%-ǵa, aqyly qyzmetter 8,9%-ǵa, azyq-túlik taýarlary 8,5%-ǵa ósti.
Qyrkúiek aiynda keibir azyq-túlik ónimderiniń baǵasy tómendedi. Atap aitqanda:
- piiaz – 20,7%;
- limon – 13,9%;
- sábiz – 13,6%;
- kartop – 13,4%;
- baklajan – 11,2%;
- qyryqqabat – 10,1%;
- tátti burysh – 6,5%;
- alma – 5,3%;
- almurt – 2,4%;
- sarymsaq – 1,3%;
- banan – 0,7%.
Sonymen qatar balalar taǵamyna arnalǵan botqalardyń baǵasy 6,1%-ǵa, qumsheker 1,3%-ǵa arzandaǵan.
Azyq-túlikke jatpaityn taýarlardyń ishinde qol kremi 6,9%-ǵa, balalar jaialyqtary 6,6%-ǵa, teledidar 5,6%-ǵa, ydys jýatyn mashina men qysqa tolqyndy pesh 1,8%-ǵa, dýshqa arnalǵan gel 1,4%-ǵa arzandady.
2025 jylǵy qyrkúiekpen salystyrǵanda da keibir jemis-kókónis ónimderiniń baǵasy tómendegen. Máselen, alma 11,1%-ǵa, limon 8,3%-ǵa, qyzylsha 6,9%-ǵa, qyryqqabat 6,1%-ǵa, banan 5,6%-ǵa, tátti burysh 3,9%-ǵa arzandaǵan.
Al azyq-túlikke jatpaityn taýarlar arasynda avtomobilderdiń baǵasy bir jylda 11,3%-ǵa, elektr jylytqyshtar 9,1%-ǵa, konditsionerler 8,7%-ǵa, elektr ettartqyshtar 5,6%-ǵa tómendedi.
Aita keteiik, tutyný baǵalary indeksi 537 taýar men qyzmet túriniń baǵasy men tarifterin baqylaý negizinde esepteledi. 2026 jyldan bastap indeks qurylymynda azyq-túlik taýarlarynyń úlesi 41,1%, azyq-túlikke jatpaityn taýarlar – 28,4%, aqyly qyzmetter – 30,5% bolyp belgilengen.
