Úkimet jol boiyndaǵy servis stansalaryn salýǵa baǵyttalǵan iri investitsiialyq jobany maquldady. Joba aiasynda elimizdiń halyqaralyq jáne respýblikalyq mańyzy bar avtojoldarynyń boiynda 250 jańa servis stansasyn salý josparlanyp otyr, dep habarlaidy ult.kz.
Premer-ministr qol qoiǵan qaýlyǵa sáikes, Kólik ministrligi men «Car Park Transformer» JShS arasynda jańartylatyn energiia kózderin paidalana otyryp jol boiyndaǵy qyzmet kórsetý nysandaryn salý jónindegi investitsiialyq kelisim bekitildi.
Jobaǵa tartylatyn jeke investitsiia kólemi 179,5 milliard teńgeni quraidy. Qurylys jumystary 2030 jylǵa deiin kezeń-kezeńimen júzege asyrylady. Onyń ishinde alǵashqy 50 nysan biyl salynyp, paidalanýǵa beriledi.
Jańa servis stansalary sanitarlyq-turmystyq bólmelermen, saýda jáne qyzmet kórsetý oryndarymen, elektrli kólikterge arnalǵan qýattaý beketterimen jáne kún energiiasyn óndiretin qondyrǵylarmen jabdyqtalady. Sondai-aq keshender aýmaqty abattandyrý jáne kógaldandyrý jumystaryn qamtityn zamanaýi kópfýnktsionaldy nysandar retinde boi kóteredi.
Úkimettiń málimetinshe, joba halyqaralyq standarttarǵa sai jol boiyndaǵy qyzmet kórsetý infraqurylymyn damytýǵa, elektromobilderge arnalǵan zamanaýi jaǵdai jasaýǵa jáne ekologiialyq sheshimderdi engizýge múmkindik beredi.
Sonymen qatar joba aiasynda shamamen 2 myń jańa jumys orny ashylady. Bul jol boiyndaǵy servistiń sapasyn arttyryp qana qoimai, jaqyn mańdaǵy óńirlerdiń áleýmettik-ekonomikalyq damýyna da oń áser etedi.
Qazirgi ýaqytta Qazaqstanda halyqaralyq jáne respýblikalyq mańyzy bar avtojoldar boiynda 1 428 servis nysany jumys istep tur.
