Jaqynyn jer qoinyna tapsyrǵan kúni marqumnyń otbasyna úlken dastarqan jaiyp, kópshilikke as berý dástúri qoǵamda jii talqylanyp júr. Sońǵy ýaqytta kei óńirlerde jerleý kúnindegi asty keiinge qaldyrý tájiribesi de baiqala bastaǵan, dep habarlaidy ult.kz.
Bul týraly til janashyry, jazýshy Qanat Tasibekov áleýmettik jelidegi jazbasynda aityp, Shymkenttegi tájiribeni bólisti.
Onyń sózinshe, Shymkentte ózi ekinshi ret adam jerlengen kúni janaza asy berilmeitinin kórgen. Marqumnyń jaqyndary jerleýge qatysqan adamdarmen birge ziratqa baryp, Quran baǵyshtap, keiin úilerine taraidy. Al as jetisinde beriledi.
Jerleýge qatysa almaǵan adamdar marqumnyń úiine keiin kelip, kóńil aityp, Quran oqidy. Alaida olarǵa arnaiy dastarqan jaiylyp, tamaq usynylmaidy.
Avtordyń pikirinshe, mundai tásil eń aldymen marqumnyń jaqyndaryna túsetin salmaqty azaitady. Óitkeni adamynan aiyrylǵan otbasy qaiǵynyń ústine júzdegen adamǵa as berýdiń qamyn jasaýǵa májbúr bolmaidy.
«Meiramhanany qaidan tabamyz?», «qansha adam keledi?», «jurtty qalai kútemiz?» degen uiymdastyrý máseleleri qaralyp jatqanda, otbasynyń qaraly jaǵdaiy ekinshi orynǵa túsip ketýi múmkin.
Qanat Tasibekov Qazaqstannyń ár óńirinde jerleý men aza tutýǵa qatysty dástúrlerdiń ártúrli ekenin de atap ótti. Máselen, Balqashta janaza tań atpai oqylyp, marqum kún shyqqanǵa deiin jerlenedi. Al jerleýden keiingi as adamdardyń jumys aýysymyna bailanysty kúni boiy jalǵasatyn jaǵdailar bar. Atyraýda júz kúndik as ta belgili bir ýaqytpen shektelmei, adamdardyń ózine yńǵaily ýaqytta kelýimen erekshelenedi.
Avtordyń pikirinshe, janaza kúni mol dastarqan jaiýdy mindet sanamaý – otbasynyń qaiǵysyn jeńildetetin ári artyq shyǵyndy azaitatyn sheshim.
«Zirattan jańa ǵana qaityp, jaqynyńdy jer qoinyna tapsyrǵan boida mol dastarqanǵa otyryp, as ishýdiń ózi birtúrli», – dep jazady ol.
Shymkenttegi bul tájiribe ázirge búkil Qazaqstanǵa ortaq qalyptasqan dástúr dep aitýǵa erte. Degenmen janaza kúni as bermeý, al asty keiingi kúnderge qaldyrý máselesi qoǵamda jańa kózqaras retinde talqylana bastaǵany baiqalady.
