Qazaqstanda jańa oqý jyly qarsańynda turǵyn úidi jalǵa alý baǵasy óse bastady. Sarapshylardyń aitýynsha, naryq dástúrli joǵary maýsymǵa erterek kirgen. Bul týraly Krisha.kz portaly habarlady, dep jazady ult.kz.
Portaldyń málimetinshe, sońǵy bir aida elimiz boiynsha turǵyn úidi jalǵa alý qunynyń bir sharshy metri orta eseppen 3,1%-ǵa ósken.
Baǵanyń eń joǵary ósimi Astanada tirkeldi. Elordada jaldaý aqysy bir ai ishinde 6,9%-ǵa qymbattaǵan. Odan keiin Qonaev (+6,5%), Taldyqorǵan (+5,9%) jáne Qostanai (+4,4%) qalalary ornalasqan. Almatyda jaldaý baǵasy 3,4%-ǵa, Shymkentte 3,2%-ǵa artqan. Al Túrkistan men Tarazda ózgeris baiqalmaǵan. Birde-bir qalada jaldaý quny tómendemegen.
Eń qymbat jáne eń arzan qalalar
Krisha.kz deregine sáikes, turǵyn úidi jalǵa alýdyń eń joǵary quny Almatyda saqtalyp otyr. Munda bir sharshy metrdiń ortasha baǵasy 5814 teńgeni quraidy. Odan keiin Astana (5476 teńge), Qostanai (4000 teńge), Óskemen (3947 teńge) jáne Pavlodar (3846 teńge) tur.
Al eń arzan jaldaý baǵasy Túrkistanda (2000 teńge/sh.m), Tarazda (2250 teńge/sh.m) jáne Qyzylordada (2500 teńge/sh.m) tirkelgen.
Astana keibir sanattar boiynsha Almatydan qymbat
Biylǵy jazdyń basty erekshelikteriniń biri – Astana bir jáne úsh bólmeli páterlerdi jalǵa alý quny boiynsha Almatyny basyp ozdy.
Qazir elordada bir bólmeli páterdiń ortasha ailyq jaldaý aqysy 220 myń teńge bolsa, Almatyda bul kórsetkish 210 myń teńgeni quraidy.
Úsh bólmeli páterdi jaldaý baǵasy Almatyda orta eseppen 400 myń teńge, al Astanada 500 myń teńgege jetken.
Soǵan qaramastan, sharshy metrdiń baǵasy Almatyda áli de joǵary. Sarapshylar muny Astanadaǵy páterlerdiń ortasha aýdany úlken bolýymen túsindiredi.
Táýliktik jaldaý da qymbattady
Málimetke sáikes, táýliktik jalǵa beriletin páterlerdiń baǵasy da ósken. Almatyda bir táýliktiń ortasha quny 18 myńnan 20 myń teńgege deiin kóterilse, Astanada 15 myńnan 17 myń teńgege deiin artqan.
Baǵanyń ósýine ne áser etti?
Sarapshylardyń pikirinshe, jaldaý naryǵynyń jandanýyna demalys maýsymy men jańa oqý jylyna daiyndyq áser etip otyr. Tamyz aiynda stýdentter men ózge óńirlerden keletin azamattardyń suranysy kúrt artatyndyqtan, qoljetimdi páterler tez jalǵa berilip, naryqtaǵy ortasha baǵa ósedi.
Ásirese Almatyda stýdentterdiń úlesi joǵary. Qalada 220 myńnan astam stýdent bilim alady, olardyń shamamen 150 myńy basqa óńirlerden kelgen. Jataqhana oryndarynyń tapshylyǵy kóptegen stýdentterdi páter jaldaýǵa májbúr etedi. Astanada da osyndai úrdis baiqalǵanymen, sarapshylardyń aitýynsha, stýdenttik suranystyń yqpaly Almatymen salystyrǵanda birshama tómen.
Sarapshylardyń keńesi
Joǵary suranys kezeńinde alaiaqtardyń belsendiligi de artady. Osyǵan bailanysty Krisha.kz mamandary páterdi kórmei turyp aldyn ala aqsha aýdarmaýǵa, menshik iesiniń qujattaryn tekserýge, mindetti túrde jazbasha jaldaý shartyn jasaýǵa jáne qonystanar aldynda páterdiń jaǵdaiyn fotoǵa túsirip alýǵa keńes beredi.
