Qazaq qaita óńdeý jáne taǵam ónerkásipteri ǵylymi-zertteý institýtynyń ǵalymdary jýsan negizindegi biologiialyq belsendi qospasy bar, saýyn túielerge arnalǵan alǵashqy otandyq ekstrýziialanǵan qurama jemdi ázirledi, dep habarlaidy ult.kz.
Bul ázirlemeniń elimizde balamasy joq jáne onyń tiimdiligi ǵylymi zertteýler barysynda dáleldendi.
Tórt apta boiy ǵalymdar jańa qurama jemniń janýarlardyń sút ónimdiligine áserin baqylady. Nátijesinde tájiribelik toptaǵy janýarlardyń ortasha táýliktik sút saýymy bir basqa shaqqanda 100 ml-ge artqany anyqtaldy. Sonymen qatar súttiń sapalyq kórsetkishteri de jaqsardy: mailylyǵy 1,92%-ǵa, aqýyz mólsheri 1,52%-ǵa, al maisyz qurǵaq sút qaldyǵynyń (SOMO) úlesi 0,91%-ǵa ósti.
Ázirlemeniń basty ereksheligi – Qazaqstan aýmaǵynda keń taralǵan jýsan ósimdigi negizinde daiyndalǵan biologiialyq belsendi qospany paidalanýynda. Zamanaýi óńdeý tehnologiialarynyń arqasynda ǵalymdar qorektik zattardyń tiimdi igerilýine jáne janýarlardyń ónimdiligin arttyrýǵa yqpal etetin fýnktsionaldy jem ázirledi.
Bul ázirleme ásirese qurǵaq klimat jaǵdaiyndaǵy óńirler úshin ózekti. Sebebi túie sharýashylyǵy mundai aimaqtarda mal sharýashylyǵynyń eń tózimdi ári bolashaǵy zor baǵyttarynyń biri bolyp sanalady. Jańa qurama jemdi óndiriske engizý túie sútin óndirý tiimdiligin arttyrýǵa jáne jem óndirisinde otandyq ósimdik shikizatyn keńinen paidalanýǵa múmkindik beredi.
Joba avtorlarynyń aitýynsha, zertteý nátijeleri túie sharýashylyǵyn damytýǵa jáne túie súti negizinde qosymsha quny joǵary ónimder óndirýge jańa múmkindikter ashatynyn atap ótti.
