Premer-ministrdiń orynbasary – mádeniet jáne aqparat ministri Aida Balaeva Úkimet otyrysynda Memleket basshysynyń jańa Konstitýtsiiada bekitilgen qaǵidattardy júzege asyrý jónindegi tapsyrmalaryn oryndaý boiynsha júrgizilip jatqan jumystar týraly baiandady, dep habarlaidy ult.kz.
Ol jańa Konstitýtsiiada bekitilgen qundylyqtar – ádildik, zań ústemdigi, adamǵa qurmet, ulttyq biregeilik pen qoǵamdyq jaýapkershilik – búgingi Qazaqstannyń ǵana emes, erteńgi urpaqtyń da basty negizi ekenin atap ótti.
«Biz úshin airyqsha mańyzdy ózgeristerdiń biri – mádeniet, ǵylym men bilimniń memlekettiń strategiialyq basymdyqtary deńgeiine kóterilýi. Konstitýtsiiada alǵash ret ulttyq mádeni murany saqtaý men damytý memlekettiń tikelei mindeti retinde bekitildi. Bul – mádeniettiń endi tek rýhani qundylyq qana emes, qoǵamdyq tutastyqtyń jáne eldiń uzaqmerzimdi damýynyń negizgi faktorlarynyń biri retinde tanylǵanyn bildiredi», — dep atap ótti Aida Balaeva.
Sonymen qatar Konstitýtsiia talaptaryna sáikes keltirý maqsatynda taǵy 18 zańǵa túzetýler jasalyp jatqany atap ótildi.
Atap aitqanda, sóz bostandyǵy men aqparat taratý, dini uiymdardyń qyzmeti, beibit jinalystardy ótkizý, volonterlik qyzmetti qoldaý, qaiyrymdylyq, mádeniet, kinematografiia boiynsha, sondai-aq Konstitýtsiiadan tikelei týyndaityn ózge de zańnamalyq ózgerister engizilmek.
