Álemdik naryqta sedandar áldeqashan krossoverlerge jol bergenimen, Qazaqstanda tórt esikti jeńil kólikter áli de jańa avtomobilder naryǵynyń kóshbasshysy bolyp otyr. 2025 jyly Chevrolet Cobalt eń kóp satylǵan kólik atansa, 2026 jyly da bul ataqty saqtap qalýǵa tolyq múmkindigi bar. Jyldyń alǵashqy bes aiynyń qorytyndysy boiynsha Cobalt satylymy eń jaqyn básekelesi Hyundai Tucson modelinen eki esege jýyq joǵary boldy, dep habarlaidy ult.kz.
Kolesa.kz materialynda 2026 jyldyń alǵashqy bes aiynda qazaqstandyqtar eń kóp tańdaǵan sedandar men liftbekterge sholý jasalǵan.
Sedan – tórt esikti, júksalǵyshy bólek ornalasqan klassikalyq jeńil avtokólik bolsa, liftbek – syrtqy pishini sedanǵa uqsas bolǵanymen, artqy qaqpaǵy áinegimen birge tolyq ashylatyn, júk tieýge yńǵaily kólik túri.
Qazaqstandaǵy eń tanymal bes sedan
2026 jyldyń qańtar–mamyr ailary aralyǵynda Qazaqstanda eń kóp satylǵan sedan – Chevrolet Cobalt boldy. Resmi málimet boiynsha, osy kezeńde 13 474 dana satylǵan. Onyń ishinde tek sáýir aiynda dilerler 5,3 myńnan astam kólik ótkizgen.
Qazaqstanda Cobalt tek 1,5 litrlik, 106 at kúshine ie atmosferalyq qozǵaltqyshpen jáne 6 satyly avtomatty berilis qorabymen usynylady. 2026 jylǵy modelderdiń baǵasy 6,4–6,8 mln teńge aralyǵynda.
Ekinshi orynǵa Kia Soluto jaiǵasty. Bul modelden 1 742 dana satylǵan. Ol Cobalt-pen salystyrǵanda shamamen segiz ese az bolǵanymen, 2025 jyldyń sońynda ǵana naryqqa shyqqan jańa model úshin bul jaqsy nátije sanalady. Soluto 1,4 litrlik, 95 at kúshine ie qozǵaltqyshpen jáne avtomatty qorappen jabdyqtalǵan. Baǵasy – 7 mln teńge.
Úzdik úshtikti Hyundai Elantra túiindedi. Onyń 1 605 danasy satylǵan. Qazir Elantra eki nusqada usynylady:
1,6 litrlik atmosferalyq qozǵaltqysh + 6 satyly avtomat – baǵasy 10–12,2 mln teńge;
1,5 litrlik qozǵaltqysh + variator – 9,3–9,8 mln teńge.
Aita keterligi, Elantra satyp alǵandardyń 48,6%-y variatorly, al qalǵany avtomatty berilis qoraby bar nusqany tańdaǵan.
Tórtinshi orynda Toyota Camry tur. Bes aida 1 565 dana satylǵan, onyń 400-i gibridti nusqa.
Bestikti Kia Cerato qorytyndylady. Bul modelden 1 272 kólik óz iesin tapqan.
Cerato baǵasy 10–12,4 mln teńge aralyǵynda bolsa, Camry áldeqaida joǵary segmentke jatady. Onyń bastapqy baǵasy 18,7 mln teńge, al eń qymbat gibridti nusqasy 26,2 mln teńgege deiin jetedi.
Qazaqstanda nemis sedandary qalai satylyp jatyr?
Qazaqstanda nemis avtokólikteriniń sedan segmenti negizinen premiým brendterden turady. Sondyqtan bul sanattaǵy jalpy satylym 80 kólikke de jetpeidi.
Kósh basynda BMW 5 seriiasy tur. Onyń 32 danasy satylǵan, sonyń ishinde 6 gibridti BMW M5 bar. M5 modeliniń bastapqy baǵasy 93,3 mln teńge, al qosymsha jabdyqtarǵa bailanysty baǵasy budan da joǵary bolýy múmkin.
Ekinshi orynda Mercedes-Benz E-Class – 15 dana. Onyń basym bóligi E200 nusqasy.
Úshinshi orynda Mercedes-Benz S-Class. Barlyǵy 9 kólik satylsa, onyń 6-ýy Mercedes-Maybach S580 4Matic úlesine tiesili.
Qytailyq sedandardyń úzdik úshtigi
2026 jyldyń alǵashqy jartysynda Qytai brendteri arasynda eń kóp satylǵan sedan – Geely Emgrand boldy. Onyń 517 danasy satyldy.
Emgrand baǵasy:
2025 jylǵy mehanikalyq nusqa – 6,8 mln teńgeden;
2026 jylǵy avtomatty nusqa – 9,4 mln teńgege deiin.
Ekinshi orynǵa Chery Arrizo 6 shyqty. Bul modelden 469 dana satylǵan. Ol 1,5 litrlik, 147 at kúshine ie qozǵaltqyshpen jáne robottandyrylǵan berilis qorabymen jabdyqtalǵan.
Baǵasy:
2025 jylǵy modelder – 7 mln teńgeden;
2026 jylǵy eń joǵarǵy jiyntyq – 9 mln teńgege deiin.
Úshinshi oryn kútpegen jerden BYD Chazor modeline buiyrdy. Bes aida 377 dana satylǵan.
Bul avtomobil 1,5 litrlik benzin qozǵaltqyshy men 180 at kúshine ie gibridti júiemenjabdyqtalǵan. Baǵasy 2025 jylǵy modelder úshin 9,8 mln teńgeden, al 2026 jylǵy nusqalary 10 mln teńgeden bastalady.
