Qazaqstanda kelesi jyldan bastap qaǵaz eńbek kitapshalarynan kezeń-kezeńimen bas tartyp, eńbek qyzmetin tolyq tsifrlyq formatta esepke alý máselesi qarastyrylyp jatyr. Bul týraly QR Eńbek jáne halyqty áleýmettik qorǵaý birinshi vitse-ministri Erbol Tuiaqbaev Senattaǵy brifingte málimdedi, dep habarlaidy ult.kz.
Jýrnalisterdiń qaǵaz eńbek kitapshalarynyń bolashaǵyna qatysty saýalyna jaýap bergen Erbol Tuiaqbaev bul qujattyń tsifrlandyrý dáýirinde birtindep ózektiligin joǵaltyp kele jatqanyn aitty.
Onyń sózinshe, búginde azamattardyń eńbek qyzmeti, zeinetaqy aýdarymdary men áleýmettik tólemderi týraly barlyq aqparat memlekettik aqparattyq júielerde saqtalady. Sondyqtan qaǵaz qujattardy júrgizý azamattar men jumys berýshilerge qosymsha júkteme túsiredi.
– Jasandy intellekt dáýirinde qaǵaz eńbek kitapshasynyń qajettiligi kún ótken saiyn azaiyp keledi. Memleket azamattyń eńbek joly týraly málimetterdi qaǵaz qujatsyz-aq kóre alady. Milliondaǵan adam eńbek kitapshalaryn saqtaýǵa nemese joǵalǵan jaǵdaida qalpyna keltirýge ýaqyt jumsaidy. Al jumys berýshilerdiń kadr bólimderi áli de aýqymdy qaǵaz qujat ainalymyn júrgizýge májbúr, – dedi birinshi vitse-ministr.
Onyń aitýynsha, Eńbek jáne halyqty áleýmettik qorǵaý ministrligi eńbek qyzmetin esepke alý júiesin odan ári tsifrlandyrý boiynsha jumystar júrgizip jatyr. Josparǵa sáikes, kelesi jyldan bastap qaǵaz eńbek kitapshalarynan kezeń-kezeńimen bas tartý jáne tolyq tsifrlyq formatqa kóshý jóninde naqty sheshimder qabyldanbaq.
Erbol Tuiaqbaevtyń pikirinshe, bolashaqta qyzmetkerler eńbek ótili týraly aqparatty birneshe sekýnd ishinde telefon arqyly kóre alýy tiis. Al jumys berýshiler qajetti málimetterdi muraǵattardy aqtarmai-aq jáne qosymsha anyqtamalar suratpai-aq alýǵa múmkindik alady.
Vitse-ministrdiń aitýynsha, reformanyń basty maqsaty – eńbek ótiline qatysty derekterdi avtomatty túrde rastaý júiesin qalyptastyryp, qaǵazbastylyqty azaitý, biýrokratiialyq rásimderdi qysqartý jáne qujattardyń joǵalý qaýpin joiý.
