Qazaqstanda halyqtyń psihikalyq densaýlyǵyn saqtaý tásilderi túbegeili jańǵyrtylady. Endigi basymdyq aýrýdyń saldaryn emdeýge ǵana emes, onyń aldyn alýǵa, erte anyqtaýǵa jáne azamattarǵa meditsinalyq kómektiń barlyq kezeńinde júieli qoldaý kórsetýge baǵyttalady, dep habarlaidy ult.kz.
Bul sharalar Psihikalyq densaýlyqty saqtaý jónindegi 2027–2030 jyldarǵa arnalǵan jańa keshendi josparda kózdelgen. Atalǵan keshendi jospar QR Premer-ministriniń orynbasary – mádeniet jáne aqparat ministri Aida Balaevanyń tóraǵalyǵymen Úkimette ótken keńeste qaraldy.
Jańa tásilder týraly densaýlyq saqtaý ministri Aqmaral Álnazarova baiandady. Qazirgi ýaqytta elimizde mamandandyrylǵan kómekti respýblikalyq deńgeidegi eki klinika, óńirlerdegi 20 psihikalyq densaýlyq ortalyǵy, 98 bastapqy psihikalyq densaýlyq ortalyǵy jáne aýyldyq jerlerdegi 200-den astam psihikalyq densaýlyq kabineti kórsetedi. Sonymen qatar júrgizilgen taldaý bul qyzmetti odan ári júieli túrde damytý qajettigin kórsetti.
Jańa keshendi jospar psihikalyq densaýlyq salasyndaǵy mamandardy emhanalardyń jumysyna tartýdy, aýrýlardy erte anyqtaý júiesin jetildirýdi, patsienttiń meditsinalyq kómek alý baǵytyn tsifrlandyrýdy, kadrlyq áleýetti nyǵaitýdy jáne infraqurylymdy jańǵyrtýdy qamtidy. Balalar men jasóspirimderdiń psihikalyq densaýlyǵyn qorǵaýǵa erekshe nazar aýdarylady.
Keshendi jospardy ázirleý barysynda salalyq memlekettik organdar ǵylymi zertteýlerdi damytýǵa, mamandar daiarlaý sapasyn arttyrýǵa, bilim berý baǵdarlamalaryn jańartýǵa, pedagogter men psihologterdiń biliktiligin jetildirýge baǵyttalǵan usynystaryn engizdi. Sondai-aq múgedektigi bar balalar men eresekterge arnalǵan arnaýly áleýmettik qyzmetter júiesi men tiisti infraqurylymdy odan ári damytý sharalary usynyldy.
Ministrlikter men óńir ákimdikteriniń baiandamalary tyńdalǵannan keiin Psihikalyq densaýlyqty saqtaý jónindegi 2027–2030 jyldarǵa arnalǵan keshendi jospar maquldandy.
