Qazaqstanda mal sharýashylyǵyn damytý jáne azyq-túlik qaýipsizdigin nyǵaitý maqsatynda «Jailaý» atty jańa jeńildetilgen nesielik baǵdarlama iske qosyldy, dep habarlaidy ult.kz.
Aýyl sharýashylyǵyn qoldaýǵa baǵyttalǵan jańa qarjy quraly Mal sharýashylyǵyn damytýdyń keshendi jospary aiasynda júzege asyrylýda. Baǵdarlama qýattylyǵy keminde 300 bas iri qara nemese 1000 bas usaq mal ustaityn jańa sharýashylyqtardy qurýǵa qoldaý kórsetedi.
Baǵdarlama sharttaryna sáikes, jyldyq syiaqy mólsherlemesi 6 paiyzdan aspaidy, nesie merzimi 10 jylǵa deiin beriledi. Qarjylandyrý kólemi iri qara mal ósirý jobalary úshin 350 mln teńgege deiin, al usaq mal sharýashylyǵy úshin 200 mln teńgege deiin qarastyrylǵan.
Mamandardyń aitýynsha, «Jailaý» baǵdarlamasy óndiristik infraqurylymdy damytýǵa, mal sharýashylyǵy ónimderiniń kólemin arttyrýǵa jáne aýyldyq jerlerde jańa jumys oryndaryn ashýǵa múmkindik beredi.
Sonymen qatar «Igilik», «Bereke» baǵdarlamalary men «Ainalym qarajatyn tolyqtyrý» baǵyty boiynsha jeńildetilgen qarjylandyrý aýqymy keńeitildi. Budan bylai bul baǵdarlamalar iri qaramen qatar qoi, jylqy, túie, maral, ara jáne shoshqa sharýashylyqtaryn da qamtidy.
«Igilik» baǵdarlamasy arqyly sharýalar importtyq jáne otandyq asyl tuqymdy mal satyp ala alady. Baǵdarlama boiynsha nesie mólsherlemesi jylyna 6 paiyzdan aspaidy, al qarjylandyrý merzimi 7 jylǵa deiin belgilengen.
Al «Bereke» baǵdarlamasy iri kólemde asyl tuqymdy mal satyp alýǵa baǵyttalǵan. Onyń sharttary boiynsha 500 bastan astam importtyq iri qara nemese 1000 bastan astam usaq mal satyp alýǵa jeńildetilgen nesie beriledi.
Sondai-aq sharýalarǵa jem-shóp, janar-jaǵarmai, veterinariialyq preparattar satyp alý, qyzmetkerlerdiń eńbekaqysyn tóleý jáne tehnikaǵa qajetti qosalqy bólshekter alý úshin ainalym qarajatyn tolyqtyrý múmkindigi usynylady. Bul baǵyttaǵy nesielerdiń syiaqy mólsherlemesi 5 paiyzdan aspaidy, al merzimi 12 aiǵa deiin.
Baǵdarlamalardy qarjylandyrýǵa óńirlik áleýmettik-kásipkerlik korporatsiialar da tartylyp otyr. Tolyq aqparatty aýyl sharýashylyǵy taýaryn óndirýshiler «Agrarlyq nesie korporatsiiasynyń» oblystyq filialdarynan jáne óńirlik áleýmettik-kásipkerlik korporatsiialardan ala alady.
