Kreativti indýstriialardy damytý qory QazaqCreative biryńǵai tsifrlyq platformasyn iske qosty. QR Mádeniet jáne aqparat ministrliginiń málimetinshe, jańa tsifrlyq platforma kreatorlarǵa memlekettik qoldaý tetikterin bir júie arqyly paidalanýǵa múmkindik beredi, dep habarlaidy ult.kz.
Platforma jeke jáne zańdy tulǵalardyń paidalanýyna arnalǵan. Olardyń qatarynda avtorlar, dizainerler, sýretshiler, fotograftar, mýzykanttar, qolónershiler jáne ózge de kreatorlarmen qatar, shyǵarmashylyq stýdiialar, birlestikter, agenttikter, prodiýserlik ortalyqtar men kreativti indýstriia salasynda jumys isteitin uiymdar bar.
Endi kreativti indýstriia ókilderi www.qazaqculture.com portalyndaǵy QazaqCreative bólimi arqyly tirkelip, jeke kabinetin ashyp, platformadaǵy tsifrlyq servisterdi paidalana alady.
Tirkeýden ótken paidalanýshylar óz profilin basqarýǵa, jobalary men kórsetetin qyzmetteri týraly aqparat ornalastyrýǵa, habarlamalar alýǵa jáne memlekettik qoldaý baǵdarlamalaryna qatysýǵa ótinim beredi.
QazaqCreative platformasynda grant baǵdarlamalary, jobalardy qarjylandyrý tetikteri, bilim berý jáne akseleratsiialyq baǵdarlamalar, konsýltatsiialyq, saraptamalyq, aqparattyq ári tsifrlyq qoldaý quraldaryna deiingi aqparat usynylady. Sondai-aq paidalanýshylar baiqaýlarǵa, pitching sessiialaryna, forýmdarǵa, kórmelerge jáne ózge de salalyq is-sharalarǵa qatysa alady.
Platformaǵa tirkelý úshin www.qazaqculture.com portalyndaǵy QazaqCreative bólimine ótip, tirkeý nysanyn toltyryp, qajetti málimetti engizý qajet. Moderatsiiadan ótkennen keiin paidalanýshynyń jeke kabineti ashylady.
Platforma elimizdegi kreatorlardyń ónimderi men qyzmetterine qyzyǵýshylyq tanytqan kópshilikke de arnalǵan.
QazaqCreative platformasy Qazaqstannyń kreativti ekonomikasynyń jetildirýdegi biregei bastama bolmaq. Aldaǵy ýaqytta Kreativti indýstriialardy damytý qory elimizdegi kreatorlardy qoldaý, shyǵarmashylyq kásipkerlikti damytý, saladaǵy jobalardy ilgeriletý jáne ulttyq kreativti indýstriianyń básekege qabilettiligin arttyrý baǵytyndaǵy jumystardy jalǵastyrady.
