Qazaqstanda Memleket basshysy Qasym-Jomart Toqaevtyń tapsyrmalaryn oryndaý aiasynda birqatar ulttyq joba iske asyrylyp jatyr. Úkimettiń málimetinshe, «Keleshek mektepteri» jáne «Aýylda densaýlyq saqtaýdy jańǵyrtý» jobalary aiaqtalǵan. Al «Qoljetimdi internet» pen «Energetikalyq jáne kommýnaldyq sektorlardy jańǵyrtý» jobalary jalǵasýda. Sonymen qatar «Kómir generatsiiasyn damytý» jańa ulttyq jobasy bastaldy, dep habarlaidy ult.kz.
«Keleshek mektepteri» jobasy aiasynda úsh jyl ishinde 460 myń oqýshyǵa arnalǵan 217 jańa mektep salyndy. Onyń ishinde aýyldyq jerlerde 84 mektep boi kóterdi. Nátijesinde 54 úsh aýysymdy jáne 12 apatty mektep máselesi sheshildi.
«Aýylda densaýlyq saqtaýdy jańǵyrtý» jobasy boiynsha 655 meditsinalyq-sanitariialyq alǵashqy kómek nysanynyń qurylysy aiaqtaldy. Bul shamamen 1 mln aýyl turǵynyna meditsinalyq qyzmetterdi qoljetimdi etti. Budan bólek, 32 aýdandyq aýrýhana jańǵyrtylyp, 4 mln-nan astam aýyl turǵynyna mamandandyrylǵan jáne joǵary tehnologiialyq meditsinalyq kómek kórsetý múmkindigi artty.
«Qoljetimdi internet» jobasy aiasynda joǵary jyldamdyqty internet infraqurylymy keńeitilip jatyr. 2025 jyly spýtniktik bailanys arqyly 362 aýyl internetpen qamtyldy, al el boiynsha 743 «aqtańdaq» joiyldy. 2027 jyldyń sońyna deiin 3 myńnan astam aýyldy joǵary jyldamdyqty internetpen qamtamasyz etý josparlanǵan.
Energetikalyq jáne kommýnaldyq sektorlardy jańǵyrtýǵa 2025–2029 jyldary 13 trln teńge investitsiia baǵyttaý josparlanǵan. 2025 jyly 547 mlrd teńge igerilip, 6,6 myń shaqyrym injenerlik jeli jóndeldi. 2026 jylǵa 1,1 trln teńge kóleminde qarjylandyrý bekitildi.
Al «Kómir generatsiiasyn damytý» ulttyq jobasy 2026–2030 jyldarǵa eseptelgen. Onyń aiasynda keminde 7,5 trln teńge biýdjetten tys investitsiia tartý, segiz jańa energiia nysanyn salý jáne 11 qoldanystaǵy nysandy jańǵyrtý josparlanyp otyr.
Úkimettiń málimetinshe, bul jobalar bilim berý men densaýlyq saqtaý infraqurylymyn jańartýǵa, kommýnaldyq jelilerdi damytýǵa, internet pen energiiaǵa qoljetimdilikti arttyrýǵa baǵyttalǵan.
