2026 jyldyń birinshi toqsanynda Qazaqstandaǵy bilim berý uiymdary kórsetken qyzmetterdiń jalpy kólemi 1 trln 606,6 mlrd teńgeni qurady. Onyń basym bóligi – 82,2 paiyzy biýdjet qarajaty esebinen qarjylandyrylǵan. Al halyq qarajatynyń úlesi 16,1 paiyz bolsa, kásiporyndar qarjysy 1,7 paiyzdy quraǵan, dep habarlaidy ult.kz.
Statistikaǵa sáikes, bilim berý salasyndaǵy eń iri qyzmet kólemi negizgi jáne jalpy orta bilim berý uiymdaryna tiesili. Bul baǵytta 899,6 mlrd teńgeniń qyzmeti kórsetilip, jalpy kólemniń 56 paiyzyn qamtyǵan.
Ekinshi orynda mektepke deiingi tárbie men oqytý salasy tur. Munda kórsetilgen qyzmet kólemi 244,3 mlrd teńgege jetken. Al joǵary jáne joǵary oqý ornynan keiingi bilim berý uiymdary 178,7 mlrd teńgeniń qyzmetin usynyp, jalpy kólemniń 11,1 paiyzyn qurady.
Kerisinshe, eń tómen kórsetkishter bilim berý salasyndaǵy qosalqy qyzmetterde, kólik quraldarynyń júrgizýshilerin daiarlaityn uiymdarda jáne orta bilimnen keiingi bilim berý mekemelerinde tirkelgen. Atalǵan baǵyttardaǵy qyzmet kólemi tiisinshe 17,8 mlrd teńge, 1,2 mlrd teńge jáne 67,7 mln teńgeni qurady.
Birinshi toqsan qorytyndysy boiynsha kórsetilgen qyzmetterdiń 74,6 paiyzy memlekettik menshik nysanyndaǵy uiymdarǵa tiesili bolsa, 24,7 paiyzy jekemenshik uiymdar úlesine kelgen. Sheteldik uiymdardyń úlesi nebári 0,8 paiyzdy qurady.
Kásiporyndardyń kólemine qarai qaraǵanda, eń kóp qyzmetti shaǵyn kásiporyndar kórsetken. Olardyń úlesi 769 mlrd teńgemen jalpy kólemniń 47,9 paiyzyna teń boldy. Orta kásiporyndar 595,3 mlrd teńgeniń qyzmetin kórsetse, iri kásiporyndardyń úlesi 242,3 mlrd teńgeni qurady.
Sondai-aq esepti kezeńde bilim berý uiymdary internet jelisi arqyly 8,4 mlrd teńgege jýyq qyzmet kórsetken. Bul tsifrlyq bilim berý qyzmetterine suranystyń artyp kele jatqanyn kórsetedi.
