Ulttyq statistika biýrosynyń málimdeýinshe 2026 jylǵy qańtar-mamyr ailarynyń qorytyndysy boiynsha Qazaqstanda 1,6 mlrd litr mineraldy sý men alkogolsiz sýsyn óndirildi. Bul ótken jyldyń sáikes kezeńimen salystyrǵanda 17%-ǵa kóp, dep habarlaidy ult.kz.
Ishki naryqtaǵy ótkizý kólemi 1,7 mlrd litrge jetip, 21% artty. Sonymen qatar alkogolsiz sýsyndar importy 29,6% ósip, 217,1 mln litrdi qurady. Ishki naryqtaǵy importtyq ónimniń úlesi 11,4% boldy.
Eksporttyń negizgi bóligin dástúrli túrde qant nemese ózge de táttilendirgishter, sondai-aq hosh iistendirgish jáne dámdik qospalar qosylǵan sýlar men basqa da alkogolsiz sýsyndar qurady. Esepti kezeńde osy ónim túriniń eksporty 172,8 mln litrge jetip, aqshalai kólemi 75,5 mln AQSh dollaryn qurady.
Eksporttyń eń iri naryǵy burynǵysynsha Qyrǵyzstan bolyp otyr. Bul elge 94,9 mln litr ónim eksporttalyp, onyń quny 39,0 mln AQSh dollaryn qurady.
Ózbekstanǵa eksport kólemi aitarlyqtai ósip, 39,2 mln litrden 48,3 mln litrge deiin ulǵaidy. Al jetkizilim quny 28,1 mln AQSh dollaryna jetti.
Eń joǵary ósim Reseige eksportta baiqaldy. Jetkizilim kólemi 2,5 eseden astam artyp, 9,2 mln litrden 23,5 mln litrge deiin ósti. Sondai-aq Armeniiaǵa eksport kólemi shamamen 10 esege ulǵaiyp, 548,5 myń litrge jetti. Ázerbaijan men Grýziiaǵa jetkizilimder 12 eseden astam ósip, tiisinshe 342,1 myń jáne 393,5 myń litrdi qurady.
Budan bólek, Tájikstanǵa eksport 2,5 mln litrden 2,9 mln litrge deiin, Mońǵoliiaǵa 802,1 myń litrden 930,2 myń litrge deiin, al Koreia Respýblikasyna 117,7 myń litrden 171,5 myń litrge deiin artty.
Aita keteiik, 2025 jyldyń qorytyndysy boiynsha Qazaqstanda alkogolsiz sýsyn óndirisimen 145 kásiporyn ainalysty.
