23-30 qyrkúiek aralyǵynda mektepterde 2-4-synyp oqýshylary úshin alǵashqy aralyq baǵalaý kezeńi ótedi, dep habarlaidy ult.kz.
Oqý-aǵartý ministrliginiń habarlaýynsha, 2026-2027 oqý jylynda 2-4-synyptarda formativtik jáne aralyq baǵalaý qatar júrgiziledi. Baǵalaýdyń bul eki túri bir-birin tolyqtyrady jáne oqý protsesi barysynda qatar qoldanylady.
Aralyq baǵalaý oqý baǵdarlamasynyń aiaqtalǵan bólimderi boiynsha júrgiziledi. Baǵalaý formaty pánge bailanysty:
- qazaq tili nemese orys tili - diktant jáne oqý saýattylyǵyna arnalǵan tapsyrmalar. Oqýshynyń mátindi saýatty jazýy jáne onyń mazmunyn túsinýi baǵalanady;
- ádebiettik oqý - shyǵarma nemese mazmundama jáne oqý saýattylyǵyna arnalǵan tapsyrmalar. Mátindi túsiný, negizgi oidy anyqtaý jáne óz oiyn júieli jetkizý eskeriledi;
- matematika - baqylaý jumysy. Esepteý daǵdylarymen qatar, eseptiń shartyn túsiný, sheshý jolyn durys tańdaý jáne jaýabyn negizdei alý baǵalanady.
Bir aralyq baǵalaý jumysynyń uzaqtyǵy - 40 minýt. Eń joǵary ball: 2-synypta - 12, 3-synypta - 14, 4-synypta - 16 ball.
Formativtik baǵalaý toqsan boiy jalǵasady. Pedagog ár oqýshyny ótkizilgen sabaqtardyń keminde 30 paiyzynda baǵalap, toqsanǵa josparlanǵan oqý maqsattarynyń keminde 50 paiyzyn qamtýy tiis. Nátije 1-10 baldyq shákil boiynsha baǵalanady.
Kalligrafiia arnaiy baǵalaý maqsaty bolmasa, oqýshynyń jazý ereksheligi baldy tómendetýge negiz bolmaidy.
1-synypta baldyq baǵalaý júrgizilmeidi.
Baǵalaýdyń negizgi maqsaty - oqýshyǵa tek baǵa qoiý emes, onyń oqý materialyn qanshalyqty meńgergenin anyqtaý, ilgerileýin baqylaý jáne ári qarai damýyna baǵyt berý. Baǵalaý balanyń alǵa jyljýyna kómektesetin keri bailanys quraly bolýy tiis.
