Astanada qurylys alańynda munaraly krandy bólshekteý kezinde kran mashinisi biikten qulap, oń aiaǵynan aiyryldy. Qazir úsh balany jalǵyz tárbielep otyrǵan Aqmaral Qaralieva aýrýhanada jatyr. Ol jumys berýshiden uzaq merzimdi qarjylyq ótemaqy talap etip otyr, dep habarlaidy ult.kz.
KTK arnasynyń habarlaýynsha, oqiǵa 31 tamyzda bolǵan. Krandy bólshekteý kezinde qurylym qulap, slesar oqiǵa ornynda qaza tapqan. Al kran mashinisi aýyr jaǵdaida aýrýhanaǵa jetkizilgen.
Aqmaral Qaralievanyń aitýynsha, jumysshylarǵa kran sektsiialaryn eki-ekiden sheshý týraly nusqaý berilgen. Osydan keiin kran qatty shaiqalyp, ol biikten qulap ketken.
Jumys berýshi áielge múgedekter arbasyn alyp bergen jáne úsh ailyq jalaqy kóleminde ótemaqy tóleýge ýáde etken. Alaida Qaralieva eńbekke qabilettiliginen aiyrylǵanyn aityp, turaqty qarjylyq qoldaý kórsetilýin surap otyr. Onyń jaqynda bólip tóleýge páter alǵany, turǵyn úi boiynsha qaryzy 19 mln teńgeden asatyny da belgili boldy.
Kompaniia oqiǵaǵa qatysty pikir bildirýden bas tartqan.
Memlekettik eńbek inspektsiiasynyń málimetinshe, áiel resmi túrde jumysqa qabyldanǵan jáne saqtandyrý sharty bar. Qazir arnaiy komissiia apattyń sebepterin anyqtap jatyr. Tergeý aiaqtalǵan soń tiisti akt jasalyp, saqtandyrý tólemderin rásimdeý úshin saqtandyrý kompaniiasyna jiberiledi.
Meditsinalyq-áleýmettik saraptama áieldiń eńbekke qabilettilikten aiyrylý deńgeiin anyqtaidy. Osy kórsetkishke qarai oǵan tiisti tólemder taǵaiyndalady.
Qaralievany osy aptada aýrýhanadan shyǵarý josparlanyp otyr.
